Qırımlılarnıñ mektüpleri: Qırımda mayıs paradları lâğu etildi. Sebebi ne?

KEFE – evde divanda oturam, birden – uçaq sesi, soñra "Bams!", soñra ise daa bir kere! Bu ne edi? Memurlar susa! "Qırımnıñ rayonlarından birinde" bir şey tüşkenini deyler.

Köyde yaşağan aşnama telefon etim. O dey: "Bu seslerni eşitkenimde ötüm patladı! Qaçmak içün şeylerimizni bile maşnağa yüklep başladıq, amma tekrarlanmadı".

Qırımda mayısnıñ 1-ne ve 9-na paradlar ve "Ölmez alay" da keçirilmeycekler.

"Ölmez alay" mındaki adını çoqtan endi lekeledi desek olacaq. Çünki bazı insanlar kerçekten de qartbaba-bitalarınıñ resimleri ile çıqa edi. Amma kütleviylik köstermek içün kim olğanı añlaşılmağan şahıslarnıñ da resimleri berile edi. Ve sıranıñ keçişinden soñ iştirakçilerniñ resimlerni teşkilâtçılarğa nasıl qaytarğanlarını körmek külünçli edi. Er sefer yañı resimler bastırılmaycaq da. Kelecek senegece bir köşede yatarlar, soñra kene hadimlerni, memurlarnı çağırtırırlar resimlerni ellerine tutturırlar ve aq yol.

Beklenmeden bir şekilde Vladimir Putin çıqışta bulunıp, Qırım ealisiniñ kelirlerini orta seviyege arttırmağa teklif etti.

Bu nasıl? Memurlarnıñ aylâqlarını kötermekmi? Yekâne yol, o zaman bölgedeki ortalama aylıq artacaq. İş adamlarını hadimleriniñ aylıqlarını arttırmağa mecbur ettirmege imkânsız. Öyle de kirişimcilik öleyata, raatlanuv mevsimi beklenmey, quvula bilecek er kes çoqtan quvulğan. Quvulamacaqlar da. Er yerde "Kira", "Kira" yazısı ile ilânlar.

Amma istisnalar da ola: Kefede yañı seks-şop açıldı, bu müimdir!

Ana daa bir tükân qapaldı, vitrinalar boş.

Tim ekimine kettim: qapalı, çalışmay. Yañı yıldan başlap çalışmay, qayda menim tiş ekimim? Türkiyege ketken, çünki anda daa tınç.

Ve biraz kelecek raatlanuv mevsimi aqqında. İşğalciler deyler ki, er şey ola bile, mayıs bayramlarına turistler kelmey bile, amma daa yaz mevimi bar ve çoqusı raatlanıcılar tam yazda kele bileler. Trenlerni de azırlaylar, amma ekspertler Qırımdaki raatlanuv mevsimine pek skeptik baqalar.

Plâjlar da ise istihkam hattı qurula.

Şeerdeki mekteplerniñ talebeleri ise Kefeniñ natsist basqıncılarından azat etilmesi şerefine arbiy urbalarda yüreler. Bayramlar da tapıla: misal olaraq Mayısnıñ 1-ne parad olmaycaq, amma eminim ki, balalarnı Ebediy ateşke kelmege mecburlarlar.

Poliklinikalarda ise uzun nevbetler.

Armen Haçaturov, kefeli bloger (müellifniñ adı ve soyadı telükesizlik maqsadınen deñiştirildi)

«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.