«Qırım aq qorçalayıcı gruppasınıñ» bildirgenine köre, işğal etilgen Qırım ve Herson vilâyetiniñ memuriy sıñırında yarımada kirişinde FSB sıñır hızmetiniñ hadimleri qırımlılardan Rusiye pasportını köstermelerini talap ete. Pasportı olmağanlarğa memuriy ceza qararı yazıla.
Aq qorçalayıcılarğa para cezasını alğan Yalta sakini muracaat etti. Telükesizlik maqsadınen teşkilât adını aytmay. Kyivden Qırımğa qaytqan qadınnıñ bildirgenine köre, bir buçuq saat devamında onı «Perekop» keçiş noqtasında – «Çaplınka» Ukraina keçiş noqtasınıñ qarşısında – FSB hadimi sorğuğa çekti.
Neticede qırımlı «Rusiye Devlet sıñırını keçüv qaidelerini bozğanı içün» 2000 Rusiye rublesi para cezasını aldı, dep aytıla aq qorçalayıcılar derc etken qararda.
Qararda qayd etilgenine köre, «yarımadağa kirmek (çıqmaq) içün Rusiye devlet sıñırında Ukraina pasportı kelişmey, çünki bu vatandaşqa Rusiye pasportı berilgen edi».
Diger menbalar bu malümatnı tasdıqlamay. Rusiye FSBsi bu adiseni resmiy şekilde izaatlamay.
«İşğal etilgen Qırımnıñ memuriy sıñırından keçkende RF akimiyetiniñ Qırımda bergen «pasportlarnı» qullanmaq talabı ve Ukraina vatandaşı pasportını qabul etmemek işğalci memleketniñ vatandaşlığını almağa zorlav şekillerinden biri ola, yani halqara gumanitar uquqnı boza, hususan 1907 senesiniñ Gaaga şartnamesiniñ 45-inci maddesini (qara cenkniñ qanunları ve adetlerine dair şartname)», – dep añlattı QAQG talilcisi Aleksandr Sedov.
Aq qorçalayıcılar, bu areketler «işğalci memleketniñ vatandaşlığını almağa zorlap, Rusiye vatandaşları mecburiyetlerini yerine ketirmege mecbur eteler, Qırım sakinlerini Rusiye qanunlarına köre taqip eteler, aq ve serbestlikni, hususan areket serbestligini bozalar», dep qayd ete.
İyül ayınıñ başında işğal altındaki Qırımnıñ Rusiye FSBsiniñ sıñır idaresi bildirdi ki, yarımadada qayd etilgen qırımlılar memuriy sıñırnı Ukraina pasportınen keçmege tırışsa, para cezasını alacaq. Ukraina işğal etilgen Qırımda berilgen Rusiye pasportlarını tanımay ve esas Ukrainağa olarnen kirmege mümkün degil.
«KrımSOS» vatandaş teşebbüsi Ukraina Tış işler naziri Dmıtro Kulebağa ariza yollap, Rusiye tarafından Qırım sakinleriniñ Herson vilâyeti ve işğal etilgen yarımadanıñ memuriy sıñırdan serbest keçüviniñ qanunsız sıñırlanmasına cevap bermege rica etti.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
