Advokat Emil Kurbedinov Rusiye kontrolindeki İçki rayon mahkemesiniñ imam Dilâver Halilovğa qarşı çıqarğan qararını şikâyet etti. Mahkeme oña cuma namazını qıldırğanı içün 30 biñ ruble para cezasını berdi. Bu aqta advokat «Qırım birdemligine» bildirdi.
«İçki rayon mahkemesiniñ reisi Şevçenko Halilov Dilâvernen bağlı istinaf şikâyetimni Qırım Yuqarı mahkemesine yollay, dep bildirdi. Eminim, davanıñ iç bir tarafsız sebebi yoq ve imamlarğa basqı yapqanlarnıñ faydasına uydurıldı», – dep izaatladı Kurbedinov.
İmam Dlâver Halilov malümat bermesi ve Rusiye Memuriy cinayetler kodeksiniñ 5.26 maddesiniñ 4-ünci qısmına istinaden (qanunsız missionerlik faaliyeti) memuriy cinayet qararını teslim alması içün Qırımnıñ İçki rayonı Rusiye prokuraturasına davet etilgen edi.
İmam Dilâver Halilov Rusiye kontrolindeki Qırım musulmanları diniy idaresi ştatında yoq.
Bundan evet Qırımnıñ Rusiye prokuraturası aqmescitli imam Rasim Dervişevge qarşı memuriy dava açtı. Qararğa binaen, cuma vaazı ve namaz uquq bozuluvı oldı. Rusiye kontrolindeki Aqmescitniñ Mirovoy mahkemesi imam Rasim Dervişevni«qanunsız missionerlik faaliyetinde» qabaatlap, 5 biñ ruble para cezasını berdi.
