«Serbest Qırım» cemaat birleşmesiniñ faalleri qırımlı aq qorçalayıcı Abdureşit Cepparovğa yapılğan «sistematik basqı» sebebinden Rusiye ombudsmeni Tatyana Moskalkovağa muracaat yazdı. Bu aqta areket faali Reşat Memetov Qırım.Aqiqatqa bildirdi.
«Bugün, dekabrniñ 10-nda, İnsan aqları kününde, bizler iş körüşüvini keçirdik. Körüşüv çerçivesinde Rusiye quvetçileriniñ esas Ukrainadan qaytqan Abdureşit Cepparovnı sıñırdaki (memuriy sıñır – QA) daa bir teşkerüvini muzakere ettik. Aq qorçalayıcınıñ aytqanına köre, devamlı teşkerüvler endi çoqtan muntazam sürette yapıla. Cepparovnıñ aqları bozula, areket serbestligine keder etile, dep tüşünemiz», – dedi faal.
Memetovnıñ bildirgenine köre, faaller Rusiye ombudsmeni Tatyana Moskalkovağa muracaat yolladı.
«Bilemiz ki, bu vaziyette Rusiye quvetçileriniñ yapqanlarına tek Rusiye aq qorçalayıcı qurulışları tesir ete bile, şunıñ içün Rusiye ombudsmenine muracaat etmege qarar aldıq», – dep qayd etti faal.
Dekabrniñ 8-nde Rusiye FSBsiniñ hadimleri Qırım ve Herson vilâyetiniñ memuriy sıñırında qırımtatar aq qorçalayıcısı Abdureşit Cepparovnı kene tutıp, 2,5 saattan soñ yarımadağa kirsetti.
Dekabrniñ 1-nde Rusiye quvetçileri Cepparovnı memuriy sıñırda eki saattan ziyadensorğuğa çekti. Aq qorçalayıcı oktâbr ayında da tutulıp sorğuğa çekilgen edi. Cepparovnıñ fikirince, oña qarşı «dosye azırlaylar».
FSB hadimleri bunı izaatlamay.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
