Mayısnıñ 11-nde Aqmescit civarındaki Dubki mikrorayonında keçirilgen tintüvden soñ quvetçiler ev saibi Seydamet Gafarovnı Rusiye Tahqiqat komitetine alıp ketti, dep bildirdi «Qırım birdemliginiñ» faali Raul Dittan.
Onıñ aytqanına köre, advokat İslâm Velilâyev de anda kete.
«Bu (tintüv keçirilgen – QA) ev saibi sert bir şekilde tutuldı. Maşina keldi, andan avtomatlı maskalı insanlar çıqtı, maşinağa sert bir şekilde oturtıp alıp ketkenler. Tahqiqat komitetinden olğanlarını aytqanlar. Advokat tutulğan ev saibi (Seydamet Gafarovğa – QA) uquqiy yardım köstermege ketti», – dep tarif etti Raul Dittan.
Onıñ aytqanına köre, mayısnıñ 11-nde Rusiye quvetçileri tintüv keçirgen Ayub Rahimov Seydamet Gafarovnıñ evini kiralağan edi.
«Qomşularnıñ aytqanına köre, tahqiqat tedbirleri saba beş buçuqlarda başladı. Olar ateş ve patlavğa oşağan seslerni eşitti. Tahqiqat tedbirleri keçken evniñ yanına kimse kirsetilmedi, kimse kirsetilmedi – ne cemaat, ne kütleviy haber vastaları, ne advokatlar. Advokat uquqiy yardım köstermege tırıştı, amma onı kirsetmediler. Tahqiqat tedbirleri bitken soñ kirsetkenler. Kirgenimizde qan izleri ve qan kördik. Bütün şeyler bir yerde toplanıp yata edi. Politsiya hadimleriniñ aytqanına köre, bu insan tirendi ve ateş açtı ve, añlaşılğanına köre, onı öldürgenler. Saat ekide mında ritual hızmet arabası kelgen edi. Tahminen 20 daqqadan araba ketti. Mında ne oldı, ateş açtımı, uquq qoruyıcı organlarınıñ hadimleri mında o qadar vaqıt ne yaptı – belli degil», – dep qoştı faal.
Seydamet Gafarovnıñ ömür arqadaşı Fatimeniñ aytqanına köre, tintüv tınç keçti, quvetçiler evni baqtı, amma bir şey tapmadı.
Daa evel berilgen malümatqa köre, Aqmescit civarındaki Dubki mikrorayonında keçirilgen tintüv vaqtında Özbekistan vatandaşı Nabi (Ayub) Rahimov öldürildi.
Refat Çubarov ve Lutfiye Zudiyevanıñ malümatına köre, Rahimovnıñ ömür arqadaşı Sahiba Burhanova ve 15 yaşında oğullarını alâ daa tapıp olamaylar.
«Qomşular ve köydeşler politsiyağa ömür arqadaşı ve 15 yaşında oğulları ğayıp olğanına dair arizalar bere», – dep qayd etti Zudiyeva.
Qırım Muhtar Cumhuriyetiniñ prokuraturası Qırımda keçirilgen tintüv ve tutuvlarnen bağlı cinaiy tahqiqat başlattı.
Mayısnıñ 11-nde saba faaller Qırımda İçki rayonınıñ Yanış Taqıl (Zavetnoye) köyünde Ayub Rahimovnıñ evinde keçirilgen tintüv aqqında bildirdi.
«Qırım birdemligi» cemaat birleşmesi Qırım.Aqiqatqa bildirgenine köre, Aqmescit civarındaki Dubki köyünde daa bir tintüv başlandı. Tahminlerge köre, anda bu saba İçki rayonı Yanış Taqıl (Zavetnoye) köyündeki evinde tahqiqat tedbirleri keçirilgenAyub Rahimov buluna bile.
İçki rayonındaki Rusiye İç işler nazirligi bölüginiñ migratsiya meseleleri bölügine alıp ketirilgen Sahiba Burhanovanıñ oğlu 15 yaşında Taqyuddin Yanış Taqıldaki evlerinde tedbirler yekünlendi, dep bildirdi.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
