Kreml kontrolindeki Qırım Yuqarı mahkemesi istinaf arizasını red etip, Aqmescitteki ekinci «Hizb ut-Tahrir davasınıñ» beş mabüsini SİZOda qaldırdı. Bu aqta Qırım.Aqiqat mühbiri haber ete.
Böylece Farhod Bazarov, Akim Bekirov, Yaşar Muyedinov, Seitveli Seytabdiyev ve Rustem Seythalilov 2020 senesi fevralniñ 15-ne qadar apiste qalacaqlar.
«Müvekkilim Seythalilov mahkemege ketirilmedi, ne salonda , ne de video bağı vastasınen oturışuvda iştirak etmedi, çünki al-azırda dava tahqiqatçısı belgilegen psihiatrik ekspertizada hastahanede buluna. Müvekkilim mahkemege ketirilmedi dep, oturışuvnı başqa künge qaldırmağa rica ettim, amma mahkeme muracaatımnı red etti. Üç istinaf şikâyeti baqıldı. Red etilecegini tahmin etken edik. Mahkeme, fevralniñ 15-ne qadar apiste qaldırmaq qararını deñiştirmedi», – dep ayttı advokat Konstantin Rustemov.
Tünevin Rusiye kontrolindeki Qırım Yuqarı mahkemesi Aqmescitteki ekinci «Hizb ut-Tahrir davasınıñ» dört mabüsini apiste qaldırdı.
Daa evel haber etilgeni kibi, Aqmescitteki ekinci «Hizb ut-Tahrir davasınıñ» beş mabüsi Aqmescitniñ №1 SİZOsında qomşu Rusiyege avuştırılğan edi.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
