Rusiye kontrolindeki Qırım Yuqarı mahkemesi dekabrniñ 16-nda Aqmescitteki ekinci «Hizb ut-Tahrir davasınıñ» eki mabüsi Bilâl Adilov ve Raim Ayvazovnıñ imayesi bergen şikâyetlerini qanaatlendirmedi.
Böylece olar 2020 senesi fevralniñ 15-ne qadar Aqmescit SİZOsında qalacaqlar, dep bildire «Qırım birdemligi» cemaat birleşmesi.
Qayd etilgenine köre, mahkeme oturışuvında mahkümler olarğa qarşı IV Jeneva şartnamesi qullanılmasını talap etti. Advokat Rustem Kâmilev bu davanıñ siyasiy sebepleri bar, dep bildirdi.
«Bu oyunnı köstermek içün mındasıñız. Yiplerinden tartılğan qoqla kibisiñiz. Qararıñız endi azır. Sizden bir şey istemeyim, maña qarşı bu davanı qanunsız dep sayam», – dep ayttı oturışuvda Raim Ayvazov.
Bilâl Adilov aytqan sözünde Ukraina vatandaşı olğanına ve Rusiye pasportını 2014 senesiniñ adise-vaqialarından soñ almağa mecbur olğanına esaslandı. İmaye tarafınıñ delillerine baqmadan, muracaat red etildi, dep bildire aq qorçalayıcılar.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
