Rusiye kontrolindeki Qırım Yuqarı mahkemesiniñ qadısı Mihail Sobolük apiske alınğan qırımtatar faali Edem Bekirov imayesiniñ temyiz arizasını red etip, sıñırlav tedbirini deñiştirmedi. Bu aqta advokat Aleksey Ladin Qırım.Aqiqat mühbirine bildirdi.
«FSBniñ Bekirovnı ağır cinayet işlegeninden şübheli sayması müvekkilimni işkence şaraitlerinde tutmaq içün sebep olamaz. Nasıl olsa da, mahkeme imayeniñ aytqanlarını kene körmemezlikke urdı. Mence, mahkeme içün advokat ve Bekirovnıñ özü aytqanlarını añlamaqtan böyle qarar almaq daa qolay. İnsan er kün tahqiqat izolâtorınıñ işkence şaraitlerinde buluna, Rusiye tutuv şaraitlerini temin etip olamay», – dedi Ladin.
Bekirov mahkeme oturışuvı vaqtında «yaşamağa istegenini», amma SİZO şaraitlerinde «bu qıyın olğanını» bildirdi.
«Maña qarşı davanı FBS hadimleri tarafından sahteleştirilgen dep sayam», – dedi Bekirov.
Bekirovnıñ davası boyunca mahkeme üç saat keç qalıp başladı. Qabaatlav tarafınıñ Bekirovnıñ ve imayesiniñ aytqanlarınen bağlı açıq izaatları olmadı.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
Qırımnıñ Rusiye prokuraturası FSBniñ Bekirovnı hastahanege avuştırmamaq qararına qoltuttı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
