Cuma künü, martnıñ 26-nda, Rusiye kontrolindeki Aqmescitniñ Merkeziy rayon mahkemesinde Rusiyede «patlayıcı madde ve silâ saqlap bergeninde» qabaatlanğan Kremlniñ eski siyasiy mabüsi Edem Bekirovğa qarşı dava baqılıp, «K-Telekom» şirketiniñ mütehassısı sorğuğa çekildi. O, tahqiqatnıñ bildirgenine köre, mabüske ait cep telefonınıñ bulunğan yeri aqqında esabat berdi.
Advokat Aleksey Ladinniñ Qırım.Aqiqatqa bildirgenine köre, delil olaraq kösterilgen billing «mahkemede iç bir tenqitke dayanamadı».
Ladinniñ aytqanına köre, tahqiqat, Bekirov Balaklavskaya soq., 115 adresi boyunca ev yanında silâ çantasını gizli şaatqa berdi, dep bildire ve cep telefonı ağınıñ billingini delil olaraq köstere. Lâkin mahkemede berilgen suallerden soñ mütehassıs nomerniñ yöneliş tapuvı bir sıra şeyge bağlı olğanını aytıp, qullanıcınıñ tam o evniñ yanında olğanını eminliknen aytıp olamadı.
Ladinniñ qayd etkenine köre, bu «pek müim», çünki cinaiy davada qayd etilgen adres yaqınlarında o vaqıt musafirlikke barğan Edem Bekirovnıñ qızı yaşağan edi.
«Mütehassıs imayeniñ suallerine cevap berip, bu cep telefonınıñ nomerinen qullanıcı qayda olğanını yüz fayız añlatıp olamadı. Ya 89-ıncı, ya 115-inci evniñ yanında… Mütehassısnıñ aytqanına köre, qullanıcınıñ bulunğan yeri qayd etilgen sektor bir kilometr, on kilometr de ola bile», – dep qayd etti advokat Aleksey Ladin.
Nevbetteki oturışuv aprelniñ 7-ne planlaştırıldı.
Advokat Aleksey Ladin, Aqmescitniñ rayon mahkemesiniñ qırımtatar faali Edem Bekirovnıñ davası boyunca oturışuvında şaatnı gizlemek acet yoq ve onı körip sorğuğa çekmek kerek, dep muracaat etti.
Bunıñ ögüne mahkemede Bekirovnıñ davası çerçivesinde Rusiye FSBsiniñ dört hadimi sorğuğa çekildi.
Sabıq siyasiy mabüs, qırımtatar faali Edem Bekirovnıñ cinaiy davası fevralniñ 19-nda Aqmescitte temelden baqılıp başlandı.
Bundan evel Qırım Yuqarı mahkemesi evelki instantsiya mahkemesiniñ qararını deñiştirmeyip, eski siyasiy mabüs, qırımtatar faali Edem Bekirovnı qıdıruvğa ilân etti.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirovnıñ fikirince, Qırımda yañıdan başlatılğan mahkeme esnası ve qıdıruvğa ilân etilüvi qabaatlayıcı ükümnen yekünlenecek.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
