Rusiye FSBsiniñ operativ hadimi bir şey qıdırmayıp, Rusiye tarafından «patlayıcı madde ve silâ saqlap bergeninde» qabaatlanğan Kremlniñ sabıq siyasiy mabüsi Edem Bekirovnıñ davası boyunca silâ ve patlayıcı madde saqlanğan yerni birden kösterdi. Bu aqta advokat Aleksey Ladin Qırım.Aqiqatqa bildirdi.
İmayeciniñ aytqanına köre, bu malümatnı martnıñ 19-nda Rusiye kontrolindeki Aqmescitniñ Merkeziy rayon mahkemesi oturışuvında sorğuğa çekilgen şaatlar ayttı7
İmayeciniñ malümatına köre, mahkemede eki şaat ve patlayıcı tehnik sorğuğa çekildi, olar Edem Bekirovnıñ davasınen bağlı operativ-qıdıruv tedbirinde iştirak etken edi. Bu şaatlar Şimaliy-Qırım kanalınıñ gidrotehnik inşaatları yanındaki yerge keldi ve FSB hadimi birden bir boru kösterip, «gizli yer anda buluna», dep bildirdi. Bundan soñ borunı patlayıcı tehnik baqtı ve içindekiler çıqarıldı.
Advokat Aleksey Ladin, Aqmescitniñ rayon mahkemesiniñ qırımtatar faali Edem Bekirovnıñ davası boyunca oturışuvında şaatnı gizlemek acet yoq ve onı körip sorğuğa çekmek kerek, dep muracaat etti.
Bunıñ ögüne mahkemede Bekirovnıñ davası çerçivesinde Rusiye FSBsiniñ dört hadimi sorğuğa çekildi.
Sabıq siyasiy mabüs, qırımtatar faali Edem Bekirovnıñ cinaiy davası fevralniñ 19-nda Aqmescitte temelden baqılıp başlandı.
Bundan evel Qırım Yuqarı mahkemesi evelki instantsiya mahkemesiniñ qararını deñiştirmeyip, eski siyasiy mabüs, qırımtatar faali Edem Bekirovnı qıdıruvğa ilân etti.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirovnıñ fikirince, Qırımda yañıdan başlatılğan mahkeme esnası ve qıdıruvğa ilân etilüvi qabaatlayıcı ükümnen yekünlenecek.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
