İşğal etilgen Qırımda Rusiye quvetçileri yarımada ve Herson vilâyetiniñ memuriy sıñırında tutulğan Yaltadaki «Hizb ut-Tahrir davasınıñ» mabüsi Muslim Aliyevniñ qızı Gülsum Aliyevanı yiberdi.
Qırım.Aqiqat mühbiriniñ bildirgenine köre, quvetçiler onı Ermeni Bazar politsiya bölüginde beş saattan çoq tuttı.
«Bu adiy bir resmiyetçiliktir. Gülsum Aliyeva alâ daa cinaiy qıdıruvda buluna eken. Olar (politsiya – QA) FSB ile bağlanğan ve bu müessiseniñ hadimlerinden biri kelip, Aliyeva olarğa artıq meraqlı degil, dep aytqan soñ, Gülsumnıñ izaları alındı ve onı yiberdiler. Adiy bir resmiyetçilik sebebinden insannıñ bütün planları bozuldı, çünki o, alâ daa qıdırılğan şahıslar arasında bar», – dep tarif etti advokat Edem Semedlâyev Qırım.Aqiqatqa.
Advokatnıñ bildirgenine köre, «onı qıdırılğan şahıslar ve Rosfinmonitoring cedvelinden çıqarsınlar dep, şikâyet mıtlaqa berilecek».
«Ya birden mahkemege, ya da oña qarşı dava açılmasınıñ teşebbüsçisi olğan organlarğa baracaqmız, çünki bunıñ kibi problemler memuriy keçiş noqtalarında ya da şeerde sistematik ola bile», – dep qayd etti Semedlâyev.
Rosfinmonitoring saytına köre, Gülsum Aliyeva ekstremist faaliyeti ya da terrorizm ile alâqaları bar olğanına dair malümat olğan teşkilât ve şahıslar cedvelinde 766 nomera altında buluna.
Gülsum Aliyeva Qırım ve Herson vilâyetiniñ memuriy sıñırında tutulğan soñ Ermeni Bazardaki Rusiye politsiyasınıñ bölügine alıp ketirildi. Advokatnıñ aytqanına köre, Gülsumnıñ yanında oña qarşı cinaiy dava qapatılğanına dair bütün vesiqaları bar edi.
«Qırım birdemligi» birleşmesiniñ malümatına köre, Aliyeva tibbiy vesiqalarnı resmiyleştirmek ve ihtisasiy tibbiy mesleat almaq içün Hersonğa kete edi.
Rusiye quvet müessiseleriniñ izaatları şimdilik yoq.
Qırım.Aqiqat, vaziyetni közetip, tafsilâtlı malümat almağa tırışa.
2018 senesi iyül ayında Rusiye telükesizlik organlarınıñ hadimleri Yaltadaki «Hizb ut-Tahrir davasınıñ» iştirakçisi Muslim Aliyevniñ evinde «tahqiqat tedbirler» keçirgeni aqqında haber etilgen edi. Daa soñra belli olğanına köre, onıñ üyken qızı Gülsum Aliyevağa protokol tizilgen. O, Facebookta paylaşqanları içün Rusiye CK (milletlerara zıddiyet çıqaruv) 282-nci maddesine köre qabaatlanğan edi.
2019 senesi yanvar ayında Aluştadaki Tahqiqat bölügi Gülsum Aliyevağa qarşı cinaiy davanı qapattı.
2019 senesi iyünniñ 12-nde Gülsum Aliyeva Facebookta paylaşqanları içün «nefret ya da duşmanlıq doğurğanında» (Rusiye MCK 20.3.1 maddesi) qabaatlanıp, memuriy sıñırda Rusiye quvetçileri tarafından tutuldı. Bir qaç künden soñ Aluştanıñ Rusiye prokuraturası Gülsum Aliyevanıñ memuriy davasını toqtatıp, mesüliyetke çeküv müddeti bitti, dep bildirdi.
