Kreml kontrolindeki Aluşta prokuraturası qırımtatar qadın faali, Yaltadaki «Hizb ut-Tahrir davasınıñ» mabüsi Müslim Aliyevniñ qızı Gülsum Aliyevağa qarşı memuriy davanı toqtattı, dep bildire Qırım.Aqiqat mühbiri.
Prokuratura öz qararında faalni mesüliyetke çeküv müddeti yekünlengenine esaslandı.
«Memuriy cinayet işlegeninden bir yıl keçken soñ memuriy cinayet davası boyunca qarar çıqarılmay… Buña köre memüriy mesüliyetke çeküv müddeti yekünlengeni içün Aliyevağa qarşı dava qapatılsın», – dep aytıla prokuratura qararında.
Advokat Aleksey Ladinniñ qayd etkenine köre, böyle qararnı prokuratura ekinci «kereden» qabul etti.
«Prokuratura ekinci kereden imaye ve mahkeme delillerinen razı olıp, Gülsum Aliyevanıñ olmaycaq taqibini toqtattı. Bundan ğayrı, Tahqiqat komiteti Gülsumğa 282-nci madde boyunca qapatılğan cinaiy dava tahqiqatı vaqtında alınğan tehnikasını da qaytardı», – dep qayd etti advokat Qırım.Aqiqat mühbirine.
İyünniñ 12-nde Gülsum Aliyeva Facebookta paylaşqanları içün «nefret ya da duşmanlıq doğurğanında» (Rusiye MCK 20.3.1 maddesi) qabaatlanıp, memuriy sıñırda Rusiye quvetçileri tarafından tutuldı.
Keçken sene iyül ayında Rusiye telükesizlik organlarınıñ hadimleri Yaltadaki «Hizb ut-Tahrir davasınıñ» iştirakçisi Muslim Aliyevniñ evinde «tahqiqat tedbirler» keçirgeni aqqında haber etilgen edi. Daa soñra belli olğanına köre, onıñ üyken qızı Gülsum Aliyevağa protokol tizilgen. O, Rusiye CK (milletlerara zıddiyet çıqaruv) 282-nci maddesine köre qabaatlana.
2019 senesi yanvar ayında Aluştadaki Tahqiqat bölügi Gülsum Aliyevağa qarşı cinaiy davanı qapattı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
