Rusiye quvetçileri qırımtatar faali, Yaltadaki «Hizb ut-Tahrir davası» mabüsiniñ qızı Gülsum Aliyevanı Qırımnıñ memuriy sıñırında yarımadağa kirgende Facebookta yazğanları içün «nefret ya da duşmanlıq doğurğanında» (Rusiye Memuriy cinayetler kodeksiniñ 20.3.1) qabaatlap tuttı. Bu aqta Aliyevanıñ advokatı Aleksey Ladin Qırım.Aqiqat mühbirine haber etti.
Quvet müessiseleri organlarınıñ hadimleri bildirgenine köre, Aliyeva FSB tarafından qıdırıla.
Advokatnıñ aytqanına köre, Aliyeva parmaq izleri alınğan soñ politsiya bölüginden yiberilecek edi. İmaye bunı yapmaqtan vazgeçti.
Keçken sene iyül ayında Rusiye telükesizlik organlarınıñ hadimleri Yaltadaki «Hizb ut-Tahrir davasınıñ» iştirakçisi Muslim Aliyevniñ evinde «tahqiqat tedbirler» keçirgeni aqqında haber etilgen edi. Daa soñra belli olğanına köre, onıñ üyken qızı Gülsum Aliyevağa protokol tizilgen. O, Rusiye CK (milletlerara zıddiyet çıqaruv) 282-nci maddesine köre qabaatlana.
2019 senesi yanvar ayında Aluştadaki Tahqiqat bölügi Gülsum Aliyevağa qarşı cinaiy davanı qapattı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
Qırım akimiyeti ise yarımadada vatandaşlarnıñ söz serbestligi bozulğanını inkâr ete.
