Qırımda Aqmescitteki «Hizb ut-Tahrir davasınıñ» mabüsi Raim Ayvazovnıñ «qurşunğa tizilgenini taqlit etken» Rusiye FSBsiniñ hadimlerine qarşı cinaiy dava açıluvınen bağlı red qararı lâğu etildi. Bu aqta advokat Mariya Eysmont Facebookta bildirdi.
Onıñ bildirgenine köre, 2019 senesi aprelniñ 17-ne keçer gecesi FSB «Raim Ayvazovnı çölge çıqarıp, öldürecek dep qorquzdı, tiz çöktirdi ve başınıñ yanında ateş açtı».
Advokat «Qırım birdemligine» izaat berip, yapqan areketleri ve Rusiye Ceza kodeksiniñ 125-inci maddesine köre bergen şikâyet arizası neticesinde alğan vesiqaları bu dava boyunca Avropa insan aqları mahkemesiniñ işi içün meraqlı olacaq, dep eminliknen bildirdi.
2020 senesi aprel ayında advokat Mariya Eysmont Rusiye kontrolindeki Qırım garnizon arbiy mahkemesiniñ, advokatnıñ aytqanına köre, bir yıl evelsi qırımtatarı Raim Ayvazovnı tutıp, «qurşunğa tizilgenini taqlit etken» FSB hadimlerine qarşı dava açmağa razı olmağanını şikâyet etti.
Hatırlatamız, Bavurçı (Kamenka) qasabasınıñ sakini, qırımtatar faali Raim Ayvazov aprelniñ 17-nde gece Qırım ve esas Ukraina memuriy sıñırından keçkende ğayıp oldı. Tuvğanları onı qıdırmağa ketti, dep haber etilgen edi. Aprelniñ 17-nde kündüz Ayvazov tuvğanlarınen bağlandı. Raim Ayvazov 205.5 maddesiniñ 2-nci qısmına (terrorist tanılğan teşkilâtnıñ faaliyetinde iştirak etüv) istinaden qabaatlanğanını ve «Aqmescitteki ekinci Hizb ut-Tahrir davasınıñ» erkânına qoşulğanını qız qardaşına telefonda haber etti.
Daa soñra memuriy sıñırdan keçkende Rusiye quvetçileri onı gece «çölge çıqarğanını» ve «qurşunğa tizüvni taqlit etkenlerini» tarif etti.
«Qırım birdemliginiñ» malümatına köre, Raim Ayvazov Qırımda apiske alınğan qırımtatar faallerine Rostov-na-Donuğa aş ve urba yollamaqnen oğraşa edi.
«Memorial» aq qorçalayıcı merkezi Ayvazovnı siyasiy mabüs olaraq tanıdı.
