Rusiye kontrolindeki Aqmescitniñ merkeziy rayon mahkemesi avgustnıñ 27-nde SİZOdan çıqarılğan qırımtatar faali Edem Bekirovnı zorlan ketirmege mecbur etti.
Advokat İslâm Velilâyevniñ aytqanına köre, Bekirov cinaiy davasınıñ temeli baqılmağa planlaştırılğan mahkeme oturışuvına kelmedi, dep bildire Qırım.Aqiqat mühbiri.
«Mahkeme prokuror muracaatını qanaatlendirip, mahkeme vekillerini sentâbrniñ 13-ne keçirilmesi belgilengen oturışuvğa müvekkilimiz Edem Bekirovnıñ kelmesini temin etmege mecbur etti», – dedi advokat.
Avgustnıñ 27-nde Rusiye kontrolindeki Aqmescitniñ Merkeziy rayon mahkemesi qırımtatar faali Edem Bekirovnıñ sıñırlav tedbirini SİZOda tutuvdan mahkemege mecburiy kelüvge deñiştirdi.
Bekirovğa sağlıq vaziyeti tahqiqat izolâtorında tutulmasına mania olmağanını ögrenmek içün yañı mahkeme-tibbiy tedqiq yapılğan edi.
Bundan evel Rusiye kontrolindeki Qırım Yuqarı mahkemesi Bekirovnıñ Krasnoperekopsqa avuştırılmasını lâğu etti.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
Qırımnıñ Rusiye prokuraturası FSBniñ Bekirovnı hastahanege avuştırmamaq qararına qoltuttı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
