Qırımdaki Rusiye FVN, aqıntı daa bir balanı deñizge alıp ketkenini haber ete. Müessiseniñ malümatına köre, bu Yedi quyu (Leninskiy) rayonınıñ Aq Manay (Kamenskoye) köyünde iyün 29-ında oldı, oğlançıqnı şişirme şilte üstünde yaldap ketti.
"FVN hadimleri, "Dmitriy Mihaylik" qurtarıcı kater, FSB sıñır idaresiniñ eki kateri deral qaza yerine yiberilgen edi. Neticede, yalıdan bir kilometrden ziyade mesafede oğlançıqnı katerge köterdiler. Tibbiy yardımğa muhtac degil edi", - denile beyanatta.
İyün 26-sında 11 yaşındaki qızçıq yedi yaşındaki qardaşınen azbarğa çıqtı ve analarından razılıq soramayıp, dostlarınen Gorkiy adını taşığan plâjğa ketti. Yaldağanda yedi yaşındaki bala yalı yanında boğulıp battı.
Yaltanıñ yanındaki Mağaraç qasabasında iyün 21-inde aqşam bir aqay battı.
