Rusiye kontrolindeki Qırım yolbaşçısı Sergey Aksönovnıñ bildirgenine köre, keçken künü 12 yañı koronavirus hastası qayd etildi.
"Elverişsiz ülkelerden kelgenlerniñ laboratoriya monitoringi zamanında - eki, evel qayd etilgen adiselerniñ alâqa dairesi teşkerilgende Saq ve Aluştada - on hasta qayd etildi. 8 adise (66,7%) simptomsızdır", - dedi Aksönov.
Onıñ aytqanına köre, hastalarnıñ episini infektsiya hastahanesine qoydılar. Qırımdaki Rospotrebnadzor mütehassısları alâqa dairelerini belgilep, teşkerüvler yapa.
Böylece, al-azırda Qırımda 189 koronavirus hastası bar. 24-ü çetelden keldi, 19-ı – Rusiyeden. 23 hastanıñ Rusiyeden kelgenlernen alâqası oldı, 123 kişi laboratoriyada tasdıqlanğan hastalarnen alâqada olğan edi. 57 kişi tüzeldi.
Daa evel Sergey Aksenov bildirgen edi ki, mayıs 8-inde Qırımda doquz yañı koronavirus hastası qayd etildi.
Qırımda mayısnıñ 12-nden itibaren koronavirus yuqunçına oğrav telükesi sebebinden mecburiy maska rejimi kirsetile.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
