Rusiye kontrolindeki Qırım yolbaşçısı Sergey Aksenovnıñ bildirgenine köre, keçken künü doquz yañı koronavirus hastası qayd etildi.
«Üç kişi – Saq rayonı, Saq hastahanesi, tibbiyet hadimleri, bu yaramay bir tendentsiya. Üç insan Aqmescitte hastalandı, eki kişi – Yalta ve Aluştada – 95 yaşında hastanen alâqada olğan bir kişi bar», – dedi Aksenov mayısnıñ 8-nde koronavirus yuqunçı ile küreş operativ ştabınıñ toplaşuvında.
Onıñ malümatına köre, hastalar yuqunç hastahanesine alındı.
Qırım ve Aqyardaki Rospotrebnadzor idaresiniñ mütehassısları epidemiologik tahqiqat keçire, alâqada olğanlar belli, profilaktika tedbirleri kerçekleştirile.
Al-azırda Qırımda 177 koronavirus hastası bar. 22-si çetelden keldi, 18-i – Rusiyeden. 23 insan Rusiyeden kelgenlernen alâqada edi, 114-ü laboratoriyada tasdıqlanğan hastalarnen alâqada oldı. 44 insan tüzeldi. Bir koronavirus hastası vefat etti. Aqyarda 110 COVID-19 hastası bar, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
