“Qırım platforması” nümünesinde dünya Rusiyege ve potentsial tecavuzcılarğa halqara uquqnı, devletniñ topraq bütünligini, insan aqlarını ve halqlarnıñ aqlarını qorumaq içün birleştirilgen tınç vastalar küç tecavuzından daa küçlü ve tesirli olğanını köstermeli. Bu fikirni Qırım.Aqiqatqa sabıq Ukraina baş naziri ve Milliy telükesizilk ve mudafaa şurasınıñ kâtibi Yevgen Marçuk ayttı.
“Qırım platformasını” Qırımnıñ tınç yollarnen Ukrainağa qaytarmaq içün şekil ve usullarnıñ azırlanması, öz maqsatlarına irişmek usulı olaraq zaten tecavuzğa qarşı dayanmamazlıq müitini yaratılması kibi körem”, – dedi Marçuk.
Onıñ sözlerine köre, “Qırım platforması”na mümkün qadar nufuzlı devletlerni celp etmekten ğayrı, BMT, Avropa Parlamenti, OSCE kibi halqara teşkilâtlarnıñ vu hususan halqara uquq boyunca salâhiyetli mütehassıslarnıñ da celp etilüvi müimdir.
Marçuk qayd etti ki, “Qırım platforması”nıñ teşkil etilmesinde “oyle bir seviyege yetmek kerek ki, bu fikir etrafında mümkün olğanı qadar dünyanıñ uquq küçlerini ve nufuzlı devletleri toplansın”.
«Qırım platforması» halqara sammiti Ukrainada 2021 senesi avgustnıñ 21-nde olacaq, dep bildirdi Ukraina prezidenti ofisiniñ reber muavini İğor Jovkva.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Rusiye kontrolindeki Qırım yolbaşçısı Sergey Aksenov emin ki, yañı halqara meydançıqnıñ quruluvı «Qırımnı qaytarmağa» yardım etmeycek.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
