«Qırım platforması» boyunca halqara sammit Ukrainada 2021 senesi avgustnıñ 21-nde olacaq. Bu aqta Ukraina prezidenti ofisiniñ reber muavini İğor Jovkva TSN.ua içün bergen intervyüsında ayttı, dep haber ete Ukraina prezidenti ofisiniñ matbuat hızmeti.
«Qırım sammiti («Qırım platformasınıñ» sammiti – QA) keçirilecek künü belli – 2021 senesi avgustnıñ 23-ü. Prezident ofisi Tış işler nazirliginen beraber dünya liderlerine davetname, uyğun qavrayış, sammit programmasını azırlamaq ve diger teşkiliy meselelerni çezmek içün çalışa», – dedi İğor Jovkva.
«Qırım platforması» sammitinde yarımadanı işğalden qurtaruv içün belli qararlar alınmalı, dep qayd etti o.
«Biz sammit içün sammit yapmaymız. Sammitni keçirip, bu meseleni unutmamalımız. Şunıñ içün sammitten soñ beyanname peyda olmalı, ve daa müimi – Qırımnı işğalden qurtarmaq ve Qırımdaki ukrainalılarnıñ aqlarını qorumaq içün halqara aletlerniñ koordinatsiya etilmesi kerek», – dep añlattı Jovkva.
Onıñ aytqanına köre, sammit Ukraina mustaqilliginiñ 30 yılı munasebetinen keçirilecek tedbirlernen bağlı olacaq. Onıñ malümatına köre, Ukraina prezidenti Volodımır Zelenskıy çetel devletleriniñ liderlerinen telefonda laf etip, olarnı endi iştirak etmege davet ete.
«Bu künleri keniş halqara iştirak olur, dep ümüt etemiz», – dep qayd etti Jovkva.
Ukraina Tış işler nazirliginiñ daa evel bildirgenine köre, Qırımnı işğalden qurtaruv sammiti Kyivde 2021 senesi mayısta keçirilecek edi. Daa soñra Jovkva sammit bu yaz olacaq dedi, amma kününi aydınlatmağan edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Rusiye kontrolindeki Qırım yolbaşçısı Sergey Aksenov emin ki, yañı halqara meydançıqnıñ quruluvı «Qırımnı qaytarmağa» yardım etmeycek.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
