Qırımtatar Milliy Meclis reisi Refat Çubarov, bu yıl keçirilmesi planlaştırılğan “Qırım platforması” sammitinden soñ yarımadanıñ işğalden azat etilüvini tezleştirecek muayyen adımlar seslendirilmek kerek, dep saya. Şu cümleden, Rusiyege qarşı sakntsiyalarnıñ quvetleştirilmesiniñ mümkünligini de qayd etti.
“Rusiye ordusı Qırımnı kerkeçten terk etip ketmesi içün, beyanatlardan ğayrı, bu devletler tarafından körülecek muayyen adımlar seslendirilmeli. “Qırım platforması” muvafaqiyetli olması ve hayırsızlıqqa oğramaması içün elimizden kelgenini yapmalımız”, – dedi Refat Çubarov Qırım. Aqiqat Radiosınıñ yaynında.
Onıñ sözlerine köre, platformanı destekleycek çetel memleketler, Rusiyege qarşı sanktsiyalarnıñ quvetleştirilmesine, şu cümleden Rusiye energiya menbalarına deral embargo qoyulmasına qoltutmalılar.
“Ya da bu ükümetler Rusiye ile er angi münsebetlerini azğarğa endire bileler, çünki onıñ areketleri olarnıñ telükesizligi ve halqaları içün havflıdır. Bazı devletler içün bu ğayet qıyın olğanını añlaymız, bu iqtisadiy ğayıplarnen bağlı, amma Rusiye tecavuzını nasıldır etip toqtatmalımız”, – dedi Meclis reisi.
Ukraina Tış işler nazirligi Qırımnı işğalden qurtaruv sammitini Kyivde 2021 senesi mayısta keçirmege planlaştıralar, dep bildirgen edi.
Ukrainada “Qırım platforması” halqara formatınıñ destegine sammit 2021 senesi baarde degil, yazda keçirilecek. Bu aqta "Zerkalo nedeli" neşrine Ukraina prezidentiniñ diplomatik mesleatçısı İgor Jovkva aytıp berdi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Rusiye kontrolindeki Qırım yolbaşçısı Sergey Aksenov emin ki, yañı halqara meydançıqnıñ quruluvı «Qırımnı qaytarmağa» yardım etmeycek.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
