Qırım Yuqarı mahkemesiniñ qadısı Andrey Paliy vatandaş jurnalisti, «Hizb ut-Tahrir davasınıñ» mabüsi Osman Arifmemetovnı apiste qaldırdı. Bu aqta advokatı Aleksey Ladin Qırım.Aqiqat mühbirine bildirdi. Onıñ qayd etkenine köre, temyiz arizası üç ay evelsi berilse de, onı tek şimdi baqtılar.
«Sıñırlav tedbiri martnıñ soñunda belgilengen edi, al-azırda onı uzattılar, apiste tutuv müddetiniñ uzatılmasına qarşı eki istinaf oturışuvı olıp keçti. Amma bu mahkeme belli sebeplerden sozulğan edi. Neticesi zaten belli edi, mahkeme oturışuvı formal edi. Mahkeme apis cezasını lâğu eter dep tüşünmek zor edi, çünki apis müddetiniñ uzatılmasına qarar berildi», – dep qayd etti Ladin.
Advokatnıñ aytqanına köre, Osman Arifmemetov oturışuvda Rostov-na-Donu SİZOsından videobağı vastasınen iştirak etti.
«Rostov SİZOsından videobağı vastasınen bulunıp, anda bile qafeste otura edi. Qafes tışında ve imayecisiniñ yanında olmasına dair muracaatım red etildi», – dep qoştı advokat.
Ladinniñ aytqanına köre, bu muracaatlardan ğayrı, müvekkilininiñ imaye aqqı da bozuldı.
«Arifmemetovğa dava malümatlarını ögrenmege izin berilmedi. İmayeci bütün tomnı oquycaq dep belgilengen edi, amma Osman dava malümatlarını diñlemege degil, olarnı şahsen oqumağa istedi. İzin berilmedi. Eñ çoq açuvlandırğan şey de qırımtatar tilinde temyiz arizaları tercimeleriniñ kopiyaları berilmesi oldı. Oña ne temyiz arizalarınıñ aslı, ne de rus tilinde kopiyaları berildi. Yani Osman mahkemede baqılğan vesiqalarnı körmedi», – dep izaatladı imayeci.
Ladinniñ aytqanına köre, müvekkili «teslim olmay» ve iyülniñ 10-nda Moskvanıñ Qızıl meydanına çıqqan qırımtatarlarğa minnetdarlıq sözlerinen yazuvlı şiarnı azırladı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
