Kreml kontrolindeki Aqmescit Kiyev rayon mahkemesi qırımtatarı Osman Muratovnı yarımadada ilk olğan «çaqmamazlıq davası» boyunca qabaatlı tanıp, oña 10 000 ruble para cezasını berdi. Bu aqta Qırım.Aqiqat mühbiri haber ete.
İmaye ükümni «sebepsiz» sayıp, qadı Olga Kuznetsovanıñ qararına qarşı temyiz arizasını berecek ola.
«Çıqarılğan üküm qanunğa uyğun degil ve sebepsiz ola. Mahkeme qararını şikâyet etmek içün 10 künümiz bar. 10 biñ para cezası bu mahkeme esnasında sarf etilgen siñir ve vaqıt o qadar para etmez, dep aytmaq mümkün. Amma üküm şikâyet etilmese, bu madde boyunca diger insanlarnıñ mesüliyetke çekilmesi içün temel olacaq», – dedi Muratovnıñ advokatı Lilâ Gemeci.
Onıñ qayd etkenine köre, qadı Kuznetsova esnas vaqtında advokatlarnı «kompetentsiz» dep adlandırdı, muracaatlarını red etti, olarnıñ qanaatlendirilmesi qabaatlav tarafınıñ delillerini red ete bilecek edi, munaqaşa vaqtında imayeniñ sözüni böldi.
«Müvekkilimniñ qabaat delilleri olaraq kösterilgen esaslar mahkeme tahqiqatı vaqtında isbatlanmadı. Ekspert 2017 senesi satın alınğan cep telefonında 2016 senesiniñ yazışuvı nasıl tapılğanını öyle de añlatıp olamadı. Mahkeme salonında keçirilgen tahqiqat eksperimenti kösterdi ki, cep telefonında tarih ve saat deñiştirilse, böyle bir yazışuv yapıla bile. Lâkin qadı buña qulaq asmadı. Mahkeme esnası devamında böyle yanaşuv oldı», – dedi Gemeci.
Keçken sene noyabr ayında işğal etilgen Qırımda Rusiye FSBsine çaqmamazlıq boyunca ilk dava açıldı.
Kreml kontrolindeki Aqmescitniñ Kiyev rayon mahkemesi Qırımda Rusiye Ceza kodeksiniñ 205.6 maddesine istinaden açılğan birinci çaqmamazlıq davasını baqmağa başladı. FSB tahqiqatınıñ malümatına köre, qabaatlanğan kişi soyu Suriyege İGİL tarafında cenkleşmege ketkenini uquq qoruyıcılarğa bildirmedi.
Qırımda bu adise «Yarovaya qanunı» çerçivesinde qabul etilgen deñişmelerden soñ ilk olacaqtır. Çaqmama maddesine köre 100 biñ rublege qadar para cezasını almaq ya da eki yılğa qadar azatlıqtan marum qalmaq mümkün.
