Kreml kontrolindeki Aqmescitniñ Kiyev rayon mahkemesi Qırımda Rusiye Ceza kodeksiniñ 205.6 maddesine istinaden açılğan birinci çaqmamazlıq davasını baqmağa başladı. FSB tahqiqatınıñ malümatına köre, qabaatlanğan kişi soyu Suriyege İGİL tarafında cenkleşmege ketkenini uquq qoruyıcılarğa bildirmedi. Mahkümniñ advokatı Emil Kurbedinov Qırım.Aqiqatqa izaat berip, müvekkili qabaatsız ola ve «uquq qoruyıcılar dava malümatlarında yañlış bir şey yaptı», dep bildirdi.
«Mahküm etilgen insannıñ adı Osman. O, çıquv yasağı altında buluna. Onı ömür arqadaşınıñ doğmuş qardaşı İGİLge ketkenini ve anda resmiy akimiyetke qarşı cenkleşkenini bilgeninde qabaatlaylar. Amma FSBge Osman bunı bildirmedi. Evinde eki kere tintüv keçirilgen edi. Başta 2017 senesi Suriyege ketken insanğa qarşı açılğan dava boyunca. Osman o sorğuda soyu qayda ketkenini bilmey, dep ayttı», – dep tarif etti advokat.
Kurbedinovnıñ bildirgenine köre, 2018 senesi FSB hadimleri qabaatlanğannıñ evinde tekrar tintüv keçirdi, cep telefonı alındı.
«O vaqıt cep telefonı alındı, anda Osmannıñ ketken insannen yazışqanı tapılğan eken. Neticede hadimler Osman olarnı sorğuda aldattı, dep qarar çıqara, demek ki, cinayet aqqında da bildirmedi. Osman ise FSB aytqan yazışuv onıñ cep telefonı alınmazdan evel anda yoq edi, dep işandıra. Tahqiqat sahte bir şey yaptı, dep tüşüne», – dedi Kurbedinov.
Dava baqılğan ilk mahkeme oturışuvında qabaatlav şaatları sorğuğa çekildi.
«Bir qaç qabaatlav şaatı, şu cümleden ömür arqadaşınıñ babası da sorğuğa çekildi. Tintüv vaqtında olğan eki şaat da sorğuğa çekildi; Viberdeki yazışuv baqılğanda olğan şaat, bir mütehassıs ve FSB hadimi Aleksandr Kompaniyets de sorğuğa çekildi. FSB hadimleri mahkemede Suriyege ketken insannı «taqip ete edi», dep bildirdi, Osman ise bunı bilip, olarğa bunı haber etmedi», – dep qoştı advokat.
Kelecek oturışuvda imaye qabaatlav şaatlarını sorğuğa çekmege devam etecek ola.
Keçken sene noyabr ayında işğal etilgen Qırımda Rusiye FSBsine çaqmamazlıq boyunca ilk dava açıldı.
Qırımda bu adise «Yarovaya qanunı» çerçivesinde qabul etilgen deñişmelerden soñ ilk olacaqtır. Çaqmama maddesine köre 100 biñ rublege qadar para cezasını almaq ya da eki yılğa qadar azatlıqtan marum qalmaq mümkün.
