İşğal etilgen Qırımda çaqmağanğa qarşı birinci dava açıldı, dep bildire Radio Svobodanıñ rus hızmeti.
Berilgen malümatqa köre, 2016 senesi mayısta bir qırımtatarınıñ evinde tintüvler keçirildi, tehnikası alınğan edi. Menfaatlarını temsil etken advokatlar adını aydınlatmay. Tahqiqatnıñ malümatına köre, bu insan ömür arqadaşınıñ qardaşı Suriyede bulunğanını bilip, bunı uquq qoruyıcı organlarına bildirmedi ve onıñnen bağ tutmağa devam etti. Uquqçı Lilâ Gemeciniñ aytqanına köre, Ceza kodeksiniñ 205.6 maddesine («Cinayet aqqında bildirmeme») istinaden açılğan dava mahkemege 2019 senesi baarge qadar kelmek kerek.
Qırımda bu adise «Yarovaya qanunı» çerçivesinde qabul etilgen deñişmelerden soñ ilk olacaqtır. Çaqmama maddesine köre 100 biñ rublege qadar para cezasını almaq ya da eki yılğa qadar azatlıqtan marum qalmaq mümkün.
Umumen Qırımda keçken ay siyasiy davalarnıñ 30 mahkemesi oldı, Rusiye uquq qoruyıcıları faallerniñ evlerinde on tintüv ve bir tahqiqat tedbirini keçirdi, Qırımnıñ Rusiye prokuraturası, gizli operativ malümatqa esaslanıp, advokatlarnı kütleviy aktsiyalarnı teşkil etmek yasağı aqqında üç kere tenbiyelegen edi.
Bundan ğayrı, sıñırda qırımtatar faalleri bir qaç saatqa tutulğan edi, ukrainalı jurnalistniñ Qırımğa kirişi ise 10 yılğa yasaq etildi. Böyle hulâsa bazar künü keçirilgen «Qırım birdemligi» toplaşuvında faaller tarafından çıqarıldı.
Bu ay qırımtatarlardan ğayrı, Rusiyede yasaqlanğan «İyegova şaatları» diniy teşkilâtınıñ azaları da basqığa oğradı. FSB hadimleri «ekstremist cemiyetni teşkil etüv» davasınıñ tahqiqatı çerçivesinde Canköyde sekiz tintüv keçirdi, keçken sene yoq etilgen «Sivaş» yerli teşkilâtınıñ sabıq reberi Sergey Filatov tutuldı, oña qarşı cinaiy iş açıldı.
