Kreml nezaretindeki Aqmescitniñ Kiyev rayon mahkemesiniñ mahkemecisi Yevgeniy Pronin, ekinci Aqmescit "Huzb ut-Tahrir davası"nıñ iştirakçisi Eskender Süleymanovnı 2020 senesi fevral 5-ine qadar tevqif astında qaldırdı. Oturış qapalı şekilde keçti, ilân etüvge kimseni kirsetmediler.
Bunı Qırım.Aqiqatqa advokat Edem Semedlâyev aytıp berdi.
"İşte, sebepleri deñişmedi: tahqiqatta saqlana bile, şaatlarğa tesir ete bile, delillerni yoq ete bile - SİZOda qaldırmaq. Oturışnı qapalı şekli aqqında ise - mahkemeci, protsess iştirakçilerniñ havsızlığı içün odağa kimseni yibermemek kerek, dep qarar aldı. İlân etüvge de", - dedi advokat.
Semedlâyev, müşterisi özüni bir coruq duya, dep qoştı.
"Elbette ki, bu tahqiqat izolâtorından soñ er kesniñ sağlığı bozula", - dedi Semedlâyev.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
