Rusiye kontrolindeki Qırım Yuqarı mahkemesi mayısnıñ 30-nda Aqmescitteki ekinci «Hizb ut-Tahrir davasınıñ» mabüsi, qırımtatarı Raim Ayvazovnıñ SİZOda tutulmasını uzatuv qararına qarşı imayesi bergen temyiz arizasını red etti.
Bu aqta Ayvazovnıñ advokatı Mariya Eysmont Qırım.Aqiqat mühbirine bildirdi.
Advokat Ayvazovnıñ tahqiqat izolâtorında bulunuv müddetini uzatqan birinci instantsiya mahkemesiniñ qararını müvekkiliniñ cinayet işlegenine dair sebebi olmağanı içün lâğu etmege rica etti. Bundan ğayrı, Eysmont arbiy-tahqiqat organlarına nisbeten ayrı qarar çıqarmağa rica etti. Ayvazovnıñ aytqanına köre, quvetçiler maneviy ve fizik basqı yapmağa tırıştılar. Mahkeme temyiz arizasını red etip, Ayvazovnı avgustnıñ 15-ne qadar SİZOda qaldırdı.
«Yuqarı mahkeme qararı tahmin etilgen edi», – dep qayd etti Eysmont.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Belli olğanı kibi, Rusiye quvetçileri Ayvazovnı Qırımnıñ memuriy sıñırında tutıp, «çölge» qurşunğa tizüvni taqlit etken edi.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
