Kezlev yalı kenarınıñ rekonstruktsiyasını tış icracısınıñ işini begenmegenleri içün toqtattılar. Şeerniñ rusiyeli akimiyeti, işi içün yarım milliard ruble tölengen "Kaştak" şirketinen muqaveleni üzdi. Şimdi memurlar yañı tış icracısını qıdıracaq, ve obyektniñ yañıdan paranen temin etilüvini soraycaqlar.
Qırımnıñ rusiyeli Qurucılıq naziri Mihail Hramov, "Krım 24" kanalına tefsir bergende, teşkerüv vaqtında ciddiy hatalar ve malzemelerniñ satın aluvında adden tış fiyat qoyulğanı aydın oldı, dep aytıp berdi, böylece, esassız 240 million ruble tölendi. İlk leyhağa köre, yalı kenarınıñ rekonstruktsiya 770 million rublege çıqacaq edi ve onı 2019 senesiniñ yaz mevsimine qadar açacaq ediler. Bu ne içün becerilmegeni Qırım.Aqiqat Radiosı efirinde muzakere etile edi.
Rusiye federal maqsat programmasınıñ parasına Kezlev yalı kenarında park ve piyade zonalarnıñ abadanlaştıruvı, gidro inşaatlarnıñ rekonstruktsiyası ve yalı kenarını pekitüv tedbirleri yapılmaq kerek edi. Tamir işleri şeer memuriyetiniñ başı daa Andrey Filonov olğanda başlandı, şimdi oña qarşı salâhiyetini aşuv davası açılğan. Qırımnıñ rusiyeli vitse-premyeri Yevgeniy Kabanovnıñ aytqanına köre, tış icracısı iddialarnen razı olmadı, ve bu davanen küç organları oğraşıp başladı. "Kaştak" şirketiniñ özü bu vaziyetni tefsir etmedi.
Kezlevniñ şimdiki memuriyet başı Roman Tihonçuk, yalı kenarınıñ tamirini bir yıldan soñ kene başlamağa niyetleneler, dep Qırım jurnalistlerine bildirdi:
"2020 yılda biz bu obyektniñ yuridik taraflarınen oğraşacaqmız. Yapılacaq tamir işlerini belgileycekmiz. İlk leyhada nazarğa alınmağan çoq incelikler bar. Tış icracısınen mahkemede meseleni çezecekmiz, çünki o muqaveleniñ üzülmesinen razı degil. 2020 yılınıñ soñunda bu obyektniñ ekspertizasını yapacaqmız, ve onı keyfiyetli tarzda yapıp bitirmek içün ne qadar para kerek olğanını belgileycekmiz. 2021 senesinde Tereşkovskayanıñ yalı kenarını qurıp turacaqmız. Sakinlerimiz ve musafirlerimizniñ açuvını yahşı añlayım. Yañı leyhanı tizgende, yalı kenarınıñ adım-adım açılışını közde tutmağa tırışacaqmız, yani leyha tamamlanmağance bile adamlarnıñ onen qullanmağa çaresi olacaq".
Amma Tihonçuk, para teminatını eki kere, yani bir yarım milliard rublege qadar, arttırmağa kerek olacaq, dep ayta, çünki, onıñ sayğanına köre, ilk yatırımlar yeterli degil edi.
"Qırım qabarcılıqqa qarşı komiteti"nin reisi İlya Bolşedvorov, Qırım.Aqiqatqa añlattı ki, para ayırıluvınıñ arttırmasınen bağlı meseleler bütün yarımadada peyda ola.
- Bizde Qırımda bu sade bir şeydir. Aqmescitte qoqla teatri - küçük beş qatlı bina - bir milliard rublege qurula. Bugün ise, bu obyektni kimse faaliyetke keçirmegeni belli oldı: tış icracısı dey ki, smetanı tüzetmek, yañı tarihlerni tayinlemek, yañıca bezetüv malzemelerni qullanmaq ve donatmanı satın almaq kerek - bunıñ içün ise milliard degil, bir yarım milliar ruble kerek. Cumhuriyet tıp merkezinen de aynı al oldı - onı qura ediler-qura ediler, mına-mına faaliyetke keçirmege söz bere ediler, amma bir qaç ay evel, vaqtında bitirip yetiştirmeycekleri ve smetanıñ yarı fiyatına çıqacaq yañı donatmanıñ satın aluvınıñ zaruriyeti aqqında haber peyda oldı. Kimse bularnı nezaret etmey. Teşkerüvi yapılmağan qusurlı leyhalarğa para ayıralar.
İlya Bolşedvorov, bala bağçalarnıñ ve mahsuslaştırılğan internatlarnıñ qurulışında bile keyfiyetsiz leyhalar qullanılğanını qayd ete.
Qırım akimiyetiniñ maqsatı - federal paralarnı tezce masraf etip, esabatnı azırlamaqİlya Bolşedvorov
- Qırım akimiyetiniñ maqsatı - federal paralarnı tezce masraf etip, esabatnı azırlamaq, çünki başqa türlü Rusiye ükümetinden tenbi olacaq. Bir qaç yıl evel Rusiye prezidenti Keriçte Mitridat merdiveniniñ tamirini bitirmege buyurğan edi, amma onıñ alâ daa soñu körünmey. Zar-zorunen leyha vesiqalarını azırladılar, aqça ayırıldı, amma nege, kimse soñunace añlamay.
Kezlev şeer şurasınıñ kurort ve turizm bölüginiñ baş mütehassısı Sergey Vikarçuk, şeer yalı kenarı ilhaqtan evel de yaramay alda olğanını hatırlay.
Bellesem, yerli akimiyetniñ basqısına oğrağan tış icracısı neticelerni köstermege istedi, amma er şeyni yahşı etip tüşünmedilerSergey Vikarçuk
- Biz foto ve videoğa çekken edik, meseleniñ çezilüvine yatırımcılarnıñ ve cumhuriyet komitetleriniñ diqqatını celp etmege tırışa edik, türlü-türlü leyhalarımız bar edi.
Особенно ближе к Симферопольской все было в ужасном состоянии, это надо было устранять. Не то чтобы состояние в целом было критичным – но все же набережную нужно было реконструировать. Я так понимаю, россияне решили по политическим мотивам доказать, что могут сделать что-то настолько большое вот так легко, за раз. Бросились, начали, а в реальности оказалось все не так просто. Все же там живое море, там есть разные процессы и экологические моменты. Видимо, подрядчик под давлением властей очень хотел показать результат, но не все продумали, скорее всего, и тем самым навредили местным жителям и отдыхающим.
Simferopolskaya soqağına yaqın mıtlaq alı yaramay edi, onı tamir etmek kerek edi. Yoq, bütün yalı kenarı berbat edi demem, amma onıñ rekonstruktsiyasını yapmağa kerek edi. Añlağanıma köre, siyaset sebepleri ile rusiyeliler böyle büyük bir işni birden yapıp olğanlarını tasdıqlamağa istedi. Atıldılar, başladılar, amma kerçekte er şey öyle qolay olmadı. Anda canlı deñiz, çeşit-türlü protsesseler, ekologiya incilikleri bar. Bellesem, yerli akimiyetniñ basqısına oğrağan tış icracısı neticelerni köstermege istedi, amma er şeyni yahşı etip tüşünmediler ve böylece yerlilerge de, musafirlerge de zarar ketirdiler.
(Metinni Vladislav Lentsev azırladı)
