Aqmescitniñ esas özeni olğan - Salğır – hor bir alda. Rusiyeli memuriyet temizlev işleri 2019 senesi başlar dep ayta – bu iş içün 100 million ruble (tahminen 42 million grivna –QA) kerek olacaq. Ekologlar ve faaller özen temizlenmek kerek olğanınen razı, faqat paralar boşuna masraf etileceginden qorqa.
Qırım ekologik eyial merkeziniñ yolbaşçısı Anton Kovalçuk Salğır özeni temizlenmek kerek olğanından emin, lâkin yapılacaq işlerniñ keyfiyetinden şubelene.
Kölemli leyhanı amelge keçirüv – bar olğan ekosistemağa er zaman kelişmey bileAnton Kovalçuk
– Muim mesele. Elbette, özenlerniñ yataq yollarını kerekli vaziyette tutmaq pek zarurdır. Mesele bunıñ fiyatı ve temziev usulınen bağlı. Kölemli leyhanı amelge keçirüv – bar olğan ekosistemağa er zaman kelişmey bile. Şubesiz ki – paralarnıñ menimsenüvinde bir orta bir yol ve adekvatlıq olması şart.
Onıñ sözlerine köre, ilk başta Aqmescitniñ esas özeniniñ aqışına keder etken çöplüklerni temizlep almalı.
– Şubesiz zarur olğan şey – çöplük ve yıqılğan tereklernñ toplanuvınen ve sairenen alâqalı. Yani özenniñ aqışına keder etken unsurlarnı temizlemeli. Terenleştirüvge maksimum diqqatlı yanaşmalı: artqaç teşebbüs kereksizdir. Tabiatnıñ özü eñ yahşı ressamdır.
“Qırımda qabarcılıqqa qarşı küreş komiteti”niñ reisi İlya Bolşedvorov Salğırnıñ temizlenüvi içün ayrılığan 100 million ruble hırsızlanır dep saya.
Memuriyetniñ esas maqsadı – federal paralarnı menimsemekten ibaretİlya Bolşedvorov
– Memuriyetniñ esas maqsadı – federal paralarnı menimsemekten ibaret. Ne qadar çoq para kelse, o qadar çoq para menimsenmeli. Kanalizatsiya, ağlarnıñ yañartıluvı, daa bir şeyler kibi daa büyük işler yapmağa hayal küçleri yetmey, çünki kölemli işler yapılmaq kerek ya. Özleriniñ qurucılıq şirketleri yoq, çetten de birisini celp etmege istemeyler.
Aqmescitniñ sabıq rusiyeli mimarı Ernst Mavlütov da, Salğır temizlenmeli dey, lâkin işbu esnasnıñ qabarcılıq unsurı olğanından şubelene.
Ondan soñ bu territoriyalar birisiniñ “tüklü qollarına” tırmaşıp başlarErnst Mavlütov
– Bu vaziyette Salğır şeer baş planınıñ bel kemigi dep sayıla. Bunda iç şube yoq. Lâkin bu bir oyun qaydeleri olmağanı bam-başqa mesele, çünki tabiatnıñ qorçalanuvında bir sıñır yoq. Bu vaziyetniñ soñu şöyle bitebile: bizler Salğırnıñ abadanlaştırıluv, yeşillendirüv ve temizlenüvine, şeer sakinleri içün raatlanuv yerleri azırlamaq içün yarım milliard ya da 15 milliard masraf etermiz de, ondan soñ bu territoriyalar birisiniñ “tüklü qollarına” tırmaşıp başlar. İşte, bütün mesele bundan ibaret.
(Metinni Artöm Laptiyev azırladı)
