Rusiyeniñ baş nazir muavini Yelena Romanovskaya, laboratoriya tetqiqatlarından soñ Saq rayonından COVID-19 hastasınıñ ölümine bu virus sebep olağanını tasdıqladı.
Bunı o mayısnıñ 7-sinde COVID-19 tarqaluvı ile küreş operativ ştabınıñ toplaşuvında bildirdi.
"Saq rayonda vefat etken hasta boyunca komissiyanıñ resmiy tasdıqlavı bar - ölümniñ sebebi koronavirus oldı. Bugün esabatta bu adiseni qayd etecekmiz", - dedi o.
Ştab oturışında, bu Qırımda koronavirustan ilk ölümniñ tasdıq etilüvi dep qayd ettiler.
Mayısnıñ 5-inde Qırımda şübeli COVID-19 hastası ölgeni bildirile edi.
Qırımda keçken künü 8 yañı koronavirus hastası qayd etildi.
Böylece, al-azırda Qırımda 168 yañı koronavirus hastası qayd etildi. 22-si çetelden keldi, 17-si – Rusiyeden. 22 hastanıñ Rusiyeden kelgenlernen alâqası oldı, 106 kişi laboratoriyada tasdıqlanğan hastalarnen alâqada olğan edi. 41 kişi tüzeldi. Bir hasta vefat etti. Aqyarda 106 COVID-19 hastası bar, eki insan vefat etti.
Qırımnıñ Rusiye akimiyeti bildirgenine köre, mayısnıñ 12-nden itibaren maska rejimini kirsetmege azır. Daa evel Qırımda yüksek seviyeli azırlıq rejimi mayısnıñ 11-ne qadar uzatılğan edi, Aqyarda onı mayısnıñ 30-na qadar uzatqanlar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
