Qırımda şübeli COVID-19 hastası öldi. Bunı Rusiye nezaretindeki Qırım Emek ve İçtimaiy Mudafaa Nazirlikniñ başı Yelena Romanovskaya bildirdi.
"Yazıq ki, tünevin aqşma Saq rayon hastahanesinde bir patsiyent öldi. O 1950-nci yılı doğma edi. Hasta aprelniñ 30-ında Saq rayonı hastahanesine sağ taraflı pnevmoniya diagnozınen tüşti. Bundan ğayrı daa bayağı hastalığı bar edi: yürek hastalığı, ekinci tipteki şekerli diabet, üçünci seviyede semirme ve ilâhre", - dedi Romanovskaya.
Amma hastanıñ COVID-19 ile hasta olğanını daa resmiy tasdıqlamadılar.
Romanovskaya haber etkeni kibi, analiz neticesi kün devamında azır olacaq.
Böylece, Qırımda 128 koronavirus hastası bar. Aqyarda - 91, eki adam öldi.
Qırımda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi devam ete. Aqyarda bu rejim mayısnıñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
