Kreml nezaretindeki Qırım akimiyeti 2019 senesi Suriyege 240-250 biñ tonna boğday teslim etecek ola. Zahireniñ bereketi yarımada ihtiyaclarından çoqça olğanı içün, onı ihrac etmek imkânı bar, dep bildirdi Qırım hocalıq naziriniñ birinci muavini Vladimir Anühin.
“2018 senesi (Suriyege - QA) 240-250 biñ tonna zahireni ihrac ettik. Bellesek, 2019 senesi yañı bereketniñ ihracı bundan az olmaz, sayısı azlaşmaz dep ümüt etemiz”, - Anühinniñ sözlerinden yaza TASS.
2018 senesi avgustta Qırım çiftçileri (agrariyleri), planlaştırğanlarına köre, yarım qat azca boğday cıydı. Bunıñ içün, Qırım Köy hocalığı Nazirligi yarımadadan boğday çıqarılmasını vaqtınca toqtatqan edi.
Keçken yılnıñ mayıs ayında bildirilgen edi ki, baar qurğaqlığından Qırım ziraatçıları körgen zarar bir milliard rubleden ziyade olğan.
Kreml nezaretindeki Qırım ziraat nazirligi bir kün evel, yarımadada yağanaqlar yağmağanından dolayı «büyük meydanlıqlarda» qışlıq ve yazlıq ekinler ğayıp olabilecegi aqqında haber etken edi.
Bu arada Qırım ziraatçıları yerli KHVğa boğday asravından zarar körgenlerini şikâyet etken ediler. Sanktsiyalar sebebinden, qomşu Rusiye bazar coyğanı ve ucuz fiyatlardan satın alınğanından dolayı olarnıñ mahsulları pek ucuzlağan. Bundan da ğayrı, Qırım fermerlerikârnıñ büyük bir qısmını yarımadada tatlı suv yetmegeni sebebinden coyğanlar.
