Baar qurğaqlığından Qırım ziraatçıları körgen zarar bir milliard rubleden ziyadedir. Bu aqta Kreml nezareti altındaki yarımadanıñ yolbaşçısı Sergey Aksönov haber etmekte.
«Yağanaqlar olmağanı sebebinden, afsus ki, zarar bir milliard rubleni keçti. Beş regionğa aman-aman bir tamçı yağmur bile tüşmedi», – dep bildire Aksönovnıñ sözlerini «Krıminform» neşiri.
Onıñ malümatına köre, yarımdadada 100 biñ gektarğa yaqın tarla küyüp ketken.
«100 biñ gektarğa yaqın bir meydan küyüp ketti. Esasen bürtükliler. Zararnıñ miqdarı aqqında hulâsa çıqarılğan soñ aytıp olacağım», – dep ilâve ete Aksönov.
Kreml nezaretindeki Qırım ziraat nazirligi bir kün evel, yarımadada yağanaqlar yağmağanından dolayı «büyük meydanlıqlarda» qışlıq ve yazlıq ekinler ğayıp olabilecegi aqqında haber etken edi.
Bu arada Qırım ziraatçıları yerli KHVğa boğday asravından zarar körgenlerini şikâyet etken ediler. Sanktsiyalar sebebinden, qomşu Rusiye bazar coyğanı ve ucuz fiyatlardan satın alınğanından dolayı olarnıñ mahsulları pek ucuzlağan. Bundan da ğayrı, Qırım fermerlerikârnıñ büyük bir qısmını yarımadada tatlı suv yetmegeni sebebinden coyğanlar.
Ukraina Şimal-Qırım kanalı vastasınen Qırımnıñ tatlı suv ihtiyaclarınıñ 85%-ni teminley edi. Rusiye 2014 senesi Qırımnı ilhaq etken soñ, yarımadağa suv berilmesini toqtatıldı.
