Qırım çiftçileri (agrariyleri), planlaştırğanlarına köre, yarım qat azca boğday cıydı. Bunıñ içün, Qırım Köy hocalığı Nazirligi yarımadadan boğday çıqarılmasını vaqtınca toqtatacaq vesiqanı azırlay. Bunıñ aqqında müessiseniñ matbuat konferentsiasında reber Andrey Rüşin haber etti.
“Qırımdan boğday Süriye, İraq, İranğa alıp çıqarıla. Malümatımızğa köre, 6 biñ tonnağa qadar endi çıqarıldı. Biz Qırımdan boğday ihracını toqtatmaq ricasınen mektüp azırlayıq. Bizim istimalcılarımızğa qalsın ve kelecek bereketke qadar yetsin dep”, - dedi Rümşin.
Onıñ aytqanına köre, çiftçiler bu yılı 980 biñ tonna boğday cıydı. Keçken yılı ise çoqça edi – 1,4 million tonna.
“Baarde biz bol bereketke ümüt ete edik. Boğdaylar yahşı çimlendi, dım yedegi yeterli edi, amma qurğaqlıq bütün areketlerimizni nafile zametke çevirdi”, - dedi Rümşin.
Daa evel belli oldı ki, Rusiye nezareti altındaki “Qırım deñiz limanları” şirketi yılnıñ soñunda kül, boğday ve qurucılıq malzemeleriniñ Süreyege yollamasını başlaycaq. Şirketniñ reberligi bildirgenine köre, mahsulat Keriç ve Kefe limanlarından yollanılacaq.
İyülniñ 4-üne Aqyar deñiz limanınıñ matbuat hızmeti boğdaynıñ ilk qısmı kelip çıqqanını haber etti.
