Ukraina prezidenti Volodımır Zelenskıy New Yorktaki BM Baş Assambleyasınıñ 76-ncı sessiyasında çıqışta bulunıp, işğal etilgen Qırımdaki vaziyet aqqında tarif etti.
Zelenskıy, memleketlerniñ «Qırım platforması» sammitinde iştirak etkenini «BM esas printsiplerine sadıqlıq» dep adlandırdı.
«Birleşken Milletlerniñ halqara uquq ve işğal problemlerini çezmek içün meydançıqnı körmemezlikke urğanı – kimse tasdıqlamağan yañı printsiplerdir. BMni canlandırmağa istesek, mında canını ağırtıp olamağanımız kimse yoq, bunı hatırlayıq. BM – epimiz, 193 memleket. Bu memleketlerni işğalni takbih eterek, dünyada sıñırlarnıñ küçnen deñiştirilmesine qarşı olğanını kösterip, «Qırım platformasınıñ» beyannamesine qoşulmalarına davet etem», – dedi Zelenskıy.
Ukraina prezidenti bu aynıñ başında Qırımda Rusiye quvetçileri qırımtatar faali Nariman Celâlnı tuttı, dep bildirdi.
«Söz serbestliginiñ aqibeti bu, aqları, insan aqları oğrunda küreşniñ aqibeti bu. Onıñ ve vaqtınca işğal etilgen Ukraina topraqlarında ve Rusiyede tutulğan daa, tüşünseñiz, 450 ukrainalınıñ azat etilüvi meselesinde epiñizniñ qoltutuvına ümüt etem», – dep qayd etti Zelenskıy.
Ukraina prezidenti BM aza memleketlerini Qırımnen bağlı beyanname ve qararlarğa qoltutmalarına çağırdı.
Zelenskıy BM Baş kâtibi Antonio Guterres ile körüшип, Qırımda, Donbasta ve Rusiyede tevqif etilgen 450 ukrainniñ azat etilmesinde yardım etmesini istep cedvel berdi.
BM Baş Assambleyası Donbas ve Qırım meseleleri çezilecek meydançıqlardan biri ola, dep tüşüne Ukraina prezidenti Volodımır Zelenskıy.
Ukraina Tış işler naziri Dmıtro Kuleba Volodımır Zelenskıynıñ BM Baş Assambleyasınıñ sessiyasında iştirak etmek içün ABDge kerçekleştirecek ziyareti vaqtında «bütün muzakerelerde Qırım qırmızı yip» olacaq, dep bildirgen edi.
BM Baş Assambleyası yetmiş altıncı sessiyasını sentâbrniñ 14-nde açtı. BM Baş Assambleyasınıñ umumiy munaqaşaları sentâbrniñ 21-nden sentâbrniñ 27-ne qadar keçirilecek.
