Ukraina prezidenti Volodımır Zelenskıy işğal etilgen Qırım ve ORDLO sakinlerini koronavirustan vaktsiyanatsiya yapmağa söz berdi. Onıñ bildirgenine köre, Ukraina Sağlıq saqlav nazirligi milliy vaktsinatsiya planını endi azırlağan.
"İlk nevbette ekimler ve arbiyler, içtimayi hadimler, ocalar, 60-tan büyük olğanlar aşılanacaq. Elbette bu cedvelge işğal etilgen topraqlarda yaşağan vatandaşlarımızda kirsetilecek. Biz olarnı unutmaymız, bu bizim adamlarımız, bizim ukrainlerimiz, ve olar bunı is etmeleri içün er şeyni yapamız", - dedi Zelenskıy.
Tünevin Qırımda koronavirustan sekiz adam ölgen.
Dekabrniñ 19-nda, Qırımnıñ Rusiye reberi Sergey Aksönov 354 yañı koronavirus vaqiyası aqqında haber etti.
Rospotrebnadzor, Qırımda koronavirustan vefat etkenlerniñ sayısı arta, hususan 50-60 yaşlarında insanlar arasında, dep qayd ete. Vefat sayısı artmasınıñ esas menfiy sebebi – tibbiy yardım içün vaqtında muracaat etmeme ola, dep bildire müessise.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
