Tünevin Qırımda koronavirustan sekiz adam ölgen. Bu aqta Qırımnıñ Rusiye sağlıq saqlav nazirligi haber etti.
Berilgen malümatına köre, umumen pandemiya vaqtında Qırımda bu hastalıqtan 415 adam ölgen.
"2883 adam (covid) ambulator tedaviylevde, 2831 – hastahanelerde (kovid ile pnevmoniya), 41 – observatorlarda buluna. Umumen 20 339 COVID-19 hastası qayd etildi. Qırım ve Aqyar şeerinde Rospotrebnadzornıñ bölgelerara idaresi 21 049 koranavirus hastasını qayd etti", – dep yazıla malümatta.
Dekabrniñ 19-nda, Qırımnıñ Rusiye reberi Sergey Aksönov 354 yañı koronavirus vaqiyası aqqında haber etti.
Rospotrebnadzor, Qırımda koronavirustan vefat etkenlerniñ sayısı arta, hususan 50-60 yaşlarında insanlar arasında, dep qayd ete. Vefat sayısı artmasınıñ esas menfiy sebebi – tibbiy yardım içün vaqtında muracaat etmeme ola, dep bildire müessise.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
