Qırımda daa 354 kişi koronavirusqa oğradı, dep bildirdi dekabrniñ 19-nda Qırımnıñ Rusiye başı Sergey Aksönov.
“Dekabrniñ 18-nde Qırım Cuhuriyetinde 354 yañı koronavirus vaqiyası qady etildi, 21-niñ hastalıq alâmetleri yoq. Hasta olğanlarnıñ umumiy miqdarından, 272 tibbiy yardım içün muracaat etkende qayd etildi, 82 - daa evel qayd etilgen hastalarnen alâqada oldı", – dep haber etile.
Tünevin 356 yañı koronavirus hastası qayd etilgen edi, 7 kişi ölgen.
Rospotrebnadzor, Qırımda koronavirustan vefat etkenlerniñ sayısı arta, hususan 50-60 yaşlarında insanlar arasında, dep qayd ete. Vefat sayısı artmasınıñ esas menfiy sebebi – tibbiy yardım içün vaqtında muracaat etmeme ola, dep bildire müessise.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
