Rospotrebnadzor, Qırımda koronavirustan vefat etkenlerniñ sayısı arta, hususan 50-60 yaşlarında insanlar arasında, dep qayd ete. Vefat sayısı artmasınıñ esas menfiy sebebi – tibbiy yardım içün vaqtında muracaat etmeme ola, dep bildire müessise.
«Menfiy artuv bar. Soñki aftada koronavirustan vefat etken 43 insan qayd etildi. 50-54 yaşlarında vefat sayısı 12 insanğa artqanı qasevetlendire. Vefat sebeplerinden biri – hastalanğan eki künden çoq keçken soñ tibbiy yardım içün muracaat etüv – 80%, hastalardan hastalanuv – 16,8%», – dep añlattı Penkovskaya dekabrniñ 16-nda COVID-19 ile küreş operativ ştabınıñ toplaşuvında.
Onıñ malümatına köre, dekabr ayında Qırımda COVID-19-dan vefat etken 91 kişi qayd etildi, oktâbr ayında ise pandemiya devamında 75 insan vefat etti, dep qayd etilgen edi.
Penkovskaya, yarımadada koronavirus yuqunçından vefat etkenlerniñ sayısı arta, dep haber etken edi.
Keçken künü Qırımda 354 koronavirus hastası qayd etildi.
Qırımnıñ Rusiye sağlıq nazirligi bildirgenine köre, pandemiya başlağanından bu yuqunçtan 385 kişi vefat etti.
Aqyarda, soñki malümatqa köre, yılnıñ başından 5445 kişi yañı koronavirus yuqunçına oğradı, 5041 insan tüzeldi, 175 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
