Avgust 18-inde Rusiyeniñ Rostov-na-Donu Cenübiy okrugınıñ arbiy mahkemesi, Qırımlı ukrain faal Oleg Prıhodkonı öz davası boyunca keçirilgen oturıştan çıqardı.
Bunı "Qırım birdemligi" birleşmesi bildire.
Böylece, Prıhodko davasınıñ boyunca bir şaat sorğuğa çekilgende, rusiye prokurorı Aleksey Aydinov, maznunnıñ Qırım ilhaqına munasebetini soradı. Şaat Şişkin, olar bu mevzunı muzakere etmediler, dep ayttı. Amma Prıhodko, bu sualni daa bir kere bermege teklif etti ve Rusiye ve bu devletniñ prezidenti Vladimir Putin adına bir qaç sögünç söz ayttı.
Bundan soñ mahkeme onı oturıştan çıqarmağa qarar aldı.
Aprelniñ 7-sinde Oleg Prıhodkonı Rostov-na-Donu şeeriniñ SİZOsına ketirgenleri belli oldı.
Daa evel qızı bildirgeni kibi, apiske alınğan Ukraina tarafdarı faal Oleg Prıhodko işğal altındaki Qırımdan qomşu Rusiyege avuştırıldı.
Prıhodkonıñ apis müddeti sentâbrniñ 15-ne qadar uzatıldı.
Onı Aqmescit SİZOsından Rusiyeniñ Rostov-na-Donu tahqiqat izolâtorına avuştıracaqlar dep haber etildi.
Yanvarniñ 16-nda berilgen malümatqa köre, Prıhodko «patlayıcı maddelerni ve tertibatnı qanunsız aluv, berüv, satuv, saqlav ve taşuvda» qabaatlandı.
Prıhodko daa bir şeyde qabaatlandı – Lvivdeki Rusiye baş konsullığınıñ binasında patlav azırlağanında.
2019 senesi fevralniñ 8-nde Qırımdaki FSB idaresiniñ hadimleri Saq rayonınıñ Orehovo köyünde Oleg Prihodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler. Rusiye quvetçileri Prihodkonıñ evinde keçirilgen tintüvni izaatlamadı. 2016 senesi iyün ayında Rusiye quvetçileri faalni maşinasındaki ukrain nomeraları içün tutqan edi.
