Apiske alınğan Ukraina tarafdarı faal Oleg Prıhodko işğal altındaki Qırımdan qomşu Rusiyege avuştırıldı. Bu aqta qızı Natalya Şvetsova Qırım.Aqiqatqa bildirdi.
«Bazarertesi künü babam Krasnodarğa avuştırıldı. SİZOda azırlanmaq içün eki saat berip alıp ketkenler. Bugün (aprelniñ 1-nde – QA) anama telefon etip, Krasnodarda olğanını bildirdi. Etap vaqtında boldurdı, yarım metrlik «stakanda» çoq qaldı», – dep tarif etti Şvetsova.
Advokat Nazim Şeyhmambetovnıñ Qırım.Aqiqatqa bildirgenine köre, şimdilik avuştıruv aqqında resmiy bir malümat yoq. O, SİZO memuriyetinden malümat almağa tırışa.
Prıhodkonıñ apis müddeti sentâbrniñ 15-ne qadar uzatıldı.
Onı Aqmescit SİZOsından Rusiyeniñ Rostov-na-Donu tahqiqat izolâtorına avuştıracaqlar dep haber etildi.
Yanvarniñ 16-nda berilgen malümatqa köre, Prıhodko «patlayıcı maddelerni ve tertibatnı qanunsız aluv, berüv, satuv, saqlav ve taşuvda» qabaatlandı.
Prıhodko daa bir şeyde qabaatlandı – Lvivdeki Rusiye baş konsullığınıñ binasında patlav azırlağanında.
2019 senesi fevralniñ 8-nde Qırımdaki FSB idaresiniñ hadimleri Saq rayonınıñ Orehovo köyünde Oleg Prihodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler. Rusiye quvetçileri Prihodkonıñ evinde keçirilgen tintüvni izaatlamadı. 2016 senesi iyün ayında Rusiye quvetçileri faalni maşinasındaki ukrain nomeraları içün tutqan edi.
