Portugaliya qırımtatar halqı genotsidiniñ Avropa Birliginiñ OSCEdeki beyanatında añılmasını blok etti. Bu aqta Azatlıq Radiosınıñ mühbiri Rikard Jozwiak bildirdi.
«Portugaliya OSCEde Avropa Birliginiñ Qırım beyanatında sürgünlik yıllığınıñ añıluvını blok etti. Evelki beyanatlarda 1944 senesi mayıs 18-20 adiseleri daima añılğan edi», – dep yazdı Jozwiak Twitterde.
Salı künü, mayısnıñ 18-nde, sovetler qırımtatarlarnı Qırımdan sürgün etip başlağanına 77 yıl toldı. Ukraina ve dünyada qırımtatar halqı genotsidiniñ qurbanları añıldı.
Ukraina prezidenti Volodımır Zelenskıy Ukraina akimiyeti Qırım yarımadasını kontrol altına qaytarmaq içün ğayret köstere, dep qayd etti.
Qırımnıñ farqlı şeer ve rayonlarında qırımtatar halqı genotsidiniñ qurbanları hatırasına tedbirler keçirildi. Qırımtatar qorantaları fleşmob keçirdi.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
