Saq şeerinde Morskaya soqağı boyu kezinti zonasınıñ qururlışı başlandı. Leyhağa köre, mında baqma meydançıqlarınen 5,6 kilometrlik beton yalısı olmalı, oña 1,14 milliard ruble ayırıldı. Böylece tegizlengen meydanlarda raatlıq zonalarını inşaat etmege teklif etile, amma yerli sakinler buña qarşı çıqa.
Bu yıl yazda Saq faali Marina Galagan, yalıdan 40 metr uzaqlığında qurucılıq yapılğanına diqqat ayırdı. Onıñ fikrince, Rusiye federal budjetinden aqça almaq içün, sımarışçı ve icrağıca balaban meydanlarğa beton tökmege elverişlidir. Qırım.Aqiqat Radiosınıñ efirinde büyük Saq inşaatı muzakere etile edi.
Yerli matbuatqa berge intervyüsinde 2019 senesi iyül ayında Saq memuriyetiniñ rusiyeli başı vazifesini becergen Andrey İvkin, bazı yerlerde betinlı yalı kenarı suvğace baracağını aytqan edi:
"Betonlı yalı kenarı bazı yerlerde suvğaca baracaq. Biz başta inşaat meydançığını azırlaymız, topraq, çaqılnı ketirip sepemiz, soñ ise onıñ üstüne beton tökülecek. İş pek qıyındır. Amma bu meydançıqta biznes olmaycaq. Episi uzaqça, yalı kenarından tış olacaq. Ve o biznesler abadanlaştıruv, kenef, urba avmaştıruv hanelerniñ tiklemesim cıyıştırmaqnen oğraşacaq".
Qırım ekilogı Margarita Litvinenko, bu leyha yerli ekologik sistemanı deñiştirir, dep tüşüne.
Такие бетонные сооружения однозначно отрицательно влияют на режим береговМаргарита Литвиненко
- Yerli akimiyet, kirağa berilecek ya da satılacaq topraqları az olğanını ayta. İnternette körgen edim ki, yalı kenarındaki topraqta qurucılıq yapmaq içün, 500 metrlik qoruma mıntaqasını 100 metrge qadar qısqartmağa isteyler.
Soñ ise betonlı yalıdan soñ topraqlarnı inşaat içün berip olacaqlar! Tabiiy plâj olsa ise, bunı yapmaq mümkün degil. Ekologiya ceetinden tesirge baqsaq, alimler endi ayta edi ki, böyle beton inşaatlar, şübesiz, yalılarnıñ rejimine menfiy tesir ete. Bu, sadece adam ahmaqlığı ve qızğançlığıdır. Anda sanatoriyni qursalar, onıñ çirkef suvlarını temizlemeyip deñizge tökeceklerdir.
2019 senesi iyünde "Primeçaniya" matbuatı, coğrafiya ilimleri doktorı, Rusiye İlimler Akademiyasınıñ Deñiz gidrofizika institutınıñ ilmiy hadimi Yuriy Gorâçkinniñ fikrini bastıra edi:
"Baarde institutımızğa Saq memuriyetiniñ ve tış icracısınıñ vekilleri kele edi. Biz eki yıldan berli seslendirgen fikrimizni olar pek yahşı bile, ve, niayet, leyhanıñ hatalarınıqabul etip, tevsiye soray ediler. Tış icracıları, tenderden evel leyha tafsilâtınen tanışıp yetiştirmegenlerini ayttı. Memuriyet hadimleri ise, şeer büdjetiniñ büyük bir qısmını tabiiy plâj yerine qurulıcaq suniy plâjlarnıñ baqmasına masraf etmege kerek olğanınen qasevetlene edi. Musafirlerimiz sağlıqlaşqanda, bizni haberdar etmege söz bergen edi, amma sözüni yerine ketirmediler. Bir aydan soñ ise qurucılıq başlandı".
Dekabrniñ başında Saq memuriyetiniñ yañı başı Mihail Afanasyev, yerli sakinlerniñ narazılıq aktsiyasından soñ, qurucılıqnıñ bir qısmında işlerni kelecek kurort mevsimine qadar toqtatmağa vade etti.
Kezlev şeer şurasınıñ kurort ve turizm bölüginiñ sabıq baş mütehassısı Sergey Vikarçuk, icracılar iş devamında bir şeyni tüzetip olacağında şübelene.
- Ebet, abadanlaştırılğan yalıkenarı kerek, amma mütehassıslar aytqanı kibi, o, ekologiyağa zarar ketirse, olarnıñ fikrini nazarğa almaq kerek. Men bu mesele aqqında eşitken edim, amma mence, akimiyet o adamlarnıñ istegenini yahşı añlamay. Men kiyik plâjlarnı sevem, balalıqtan berli Saq ve Kezlev arasında raatlana edim. Er yerge beton tökmek - yapıla bilecek eñ aqılsız şeydir. Yalı kenarı baqılğan olmaq kerek, piyade soqaqları, maşna park yerleri, kempingler ve ilâhre olmalı. Yerli sakinlerniñ isteklerini yerine ketirseler, olarnı iş adamlarına bile bermek mümkün. Onıñ içün, şeerlilerniñ telâşlanğanı mantıqlıdır, bu faaliyetke qol tutmaq kerek. Akimiyet olarnıñ isteklerini diñlese, daa bir şeyni tüşetip yetiştirirler. Amma bu, ebet, pek qıyın olacaq.
(Metinni Vladislav Lentsev azırladı)
