Link açıqlığı

Saatnıñ esas haberi

Pavel Kazarin: Elifbe aqiqatları


Mahsus Qırım.Aqiqat içün

Ukraina, abituriyentler içün degil, özü içün davalaşa

Resmiy Kyiv işğal etilgen topraqlardan kelgen abiturientler içün ukrain oquv yurtlarına kirmesini qolaylaştırmağa teklif etti. Fikir sade, mantıqlı ve keçikken. Amma ülkede Pandora qutusını açqan tamam o edi. Endi biz istek sağlıq şuurnı yeñgenini köremiz.

Qırım ve Donbass abituriyentleri içün Ukraina oquv yurtlarınıñ qapılarını daa 2015-inci yılda açmaq kerek edi. Em de universitet saylamasını sıñırlamayıp ve kiriş imtianlarını yapmayıp mümkün olğanı qadar keñ açmağa kerek edi. Bunıñ bir qaç sebebi bar.

Qırım ve Donbass işğal altında buluna. Yerli sakinler - vaziyetniñ esirleri, onıñ mimarları degil

Birincisi. Ukrainanıñ resmiy pozitsiyası sadedir. Qırım ve Donbass işğal altında buluna. Yerli sakinler - vaziyetniñ esirleri, onıñ mimarları degil. Ukraina topraqlarını qaytarmaq içün Moskovanen küreşe. Başqa bir duşman devletiniñ akimiyeti astında yaşamaq mecburiyetinde qalğan ukrain vatandaşlarnı azat etmek içün memleket büyük qıymet töley.

Yuqarıda kösterilgennen razı olsañız, bu on altı yaşındaki gençlerniñ Ukraina universitetlerine qabul etilmemesinen nasıl uyğun kele? Doğma aqqı ile Ukraina vatandaşları olğan gençlerniñ. Azat etilmesi içün Ukraina ordusı beşinci yıldan berli cebede okoplarda oturğan gençleriniñ. Kyiv Moskovağa qarşı Ğarbiy sanktsiyalarnı uzatmağa istegende taliyini hatırlağan gençlerniñ.

Olarnı oquv yurtlarına başqa abituriyentlernen aynı şartlar ile qabul etmege çağırışlar aynecilikke oşay. Bu yaşlar başqa vilâyetlerde olğan aqranlarından artta qala. Olar işğalci mektep programmaları boyunca oqumağa mecbur. Olarnıñ bilgilerinde keyfiyet boşluqları bar ve er kesni umumiy cedvelnen ölçemege ıntıluvlar, hastalarnı sade aşlarnen yahşı etmege ıntıluvlarğa oşay. Ukraina, ağır vaziyetke tüşken vatandaşlarına yardım etmekni kerekli saymasa, başqa memleketlerniñ sakinleri bizim "özümizinkiler"ni "yabancılar"dan azat etmege istegenimizge nasıl inansın?

Ekincisi. Er bir cenk tek topraq içün degil, şu topraqlarda yaşağan adamlarnıñ zeinleri içün de yapıla. 2015-inci yılda Qırımda ve Donbassta mustaqil Ukraina vaqtında büyügen bir nesil bar edi. Olar ukrain programmalar boyunca oqudı, ukrain futbol taqımlarınıñ tarafdarları oldı ve memleketniñ paytahtını kibi Kyivni, Moskovanı degil bildi. Ve kene şu Qırımda Rusiyeniñ yapıp başlağanı ilk şey - olarğa Rusiye universitetlerine kirmek içün olduqça imtiyazlı şartlarnıñ teklif etüv edi.

Soñki beş yıl Rusiye Qırımdan ve Donbasstan olğan ukrain ösmürlerni özümsiy edi

Soñki beş yıl Rusiye Qırımdan ve Donbasstan olğan ukrain ösmürlerni özümsiy edi. 2014-ünci yılda mitinglerge barmağan ösmürlerni. Yanukoviç içün rey bermegen ve Sovet Birligine asret olmağan ösmürlerni. O Ukrainada tek topraqlarnıdegil, adamlarnı da tutıp ala edi. Resmiy Kyiv ise yarım-yurtu qararlarnı saylay edi ve yalıñız 2020-ncide tam qıymetli soylarını almağa cesaret etti.

Ayıplağanlarnıñ episi inkvizitor mantiyasını taqa. Em de öz avında o balalardan intiqam ala. İşğal vaqtında 11 yaşında olğanlardan. Ukraina universitetlerinde olarğa yer olmağanını eşitkende, olar ket-kete Rusiyeniñ, Ukrainada olar kimsege kerek olmağanını aytqanda, olarnı Ukrainanen birleştirgen iç bir şey olmağanını aytqanda, aqlı olğanında daa az şübelene.

Üçüncisi. Qırım ve Donbass sakininiñ Ukraina oquv yurtuna balasını yollamağa sebepleri çoq degil. Bu işançsızlıq şübesine sebep ola bile. İşğalci memuriyetiniñ qoşma diqqatına sebep ola bile. Soñ-soñuna, bu, balañ diplom alğanından soñ evge qaytmamasınıñ büyük ihtimalı aqqında bir ikâyedir.

Bu, balañ diplom alğanından soñ evge qaytmamasınıñ büyük ihtimalı aqqında bir ikâyedir

Ve mesele, Ukraina diplomınıñ Qırım ve Donbasstaki işğalci memuriyetleri tarafından çoq sayılmamasında degil. Mesele, Ukraina universitetinde ukrain müitte keçirilgen beş yılda dünya baqışlarınıñ deñişmesindedir. Tamam bunıñ içün Rusiye bütün postsovet devrinde qomşu memleketlerden olğan abituriyentler içün universitetleriniñ qapılarını aça edi. Yımşaq küç. Özgünlikniñ şekillemesi. Aqıl ve yürekler içün küreş.

Bugün Qırım ve Donbassta işğalci bayraqlarına quvanğanlar balasını Kyiv, Vınnıtsâ ya da İlbavğa oqumağa yibermez. Çünki anda "faşistler", "snegirler" ve "trusikli oğlançıqlar". Yalıñız vaziyetniñ tesiri altında işğalde qalğanlar yiberir. Lânetlegenleriñiz lânetni eşitmez. Amma olarnı qazanmağanlar eşitir.

Ukraina işğal etilgen topraqlarnıñ taqdiri aqqında davalarnı devam ete. Birileri olarnı qaytarmaq içün küreşe. Başqaları - olardan qorunmaq içün. Birileri, Donetsk ve Aqyarğa ukrain bayraqlar qaytsın dep cenk etmege azır. Başqaları - işğalci bayraqlar Harkiv ve Odessağa kelmemesi içün. Ancaq atta eñ sert şahinler, divar qurmaqtan evel o bir taraftan bütün fikirdeşlerni çağırtıp almaq kerek olğanınen razıdır. Böyleliknen, altı yllıq işğalden soñ Ukraina oquv yurtunda oqumağa azırlıq - eñ güzel sadıqlıq teşkerüvidir.

Altı yllıq işğalden soñ Ukraina oquv yurtunda oqumağa azırlıq - eñ güzel sadıqlıq teşkerüvidir

Bu eñ sade arifmetikadır. Mında plüs bir adam olsa, demek anda minus bir adam. Mında köçip kelgen er donetskli, luğansklı ya da qırımlı - Ukrainanıñ işğal etilgen topraqlarnıñ sakinleri adından söz yürsetmege bir sebeptir. Ukraina universitetlerinde er bir yañı abituriyent - "Rusiye dünyası" tarafından miyleri yuvulmağan bir adamdır.

Bücet aqçaları ve konkurentsiyanıñ açıqlığı içün qasevet etkenlerge ise bir qaç raqamnı hatırlatayım. Bıltır Ukrainada 1,3 million student oqudı. Olardan tahminen beş biñ - bu işğal etilgen topraqlardan talebeler. Umumen - yarım fayızdan az ola. Yoq olmaqta olğan küçük miqdar. Ve Ukrainanıñ onı deñiştirmege fırsatı olsa, onı qullanmamağa ahmaqlıq olur edi.

Ahır-soñu, Ukraina qayda bitkenini sadece özümiz belgilecekmiz. Ve işğal etilgen topraqlarnen ne yapacağımız aqqında da özümiz qarar berecekmiz. Zapt etmek ya da boşatmaq.

XS
SM
MD
LG