Avropa Şurasınıñ Parlament Assambleyası Rusiye akimiyetini sağlığı ile ciddiy problemleri olğanına baqmadan etap etken qırımtatar cemaat jurnalisti Amet Suleymanovnı azat etmesine çağırdı.
"Amet Suleymanovnıñ bir sıra ciddiy hastalığı bar, şu cümleden yürek hastalığı da. Başta o ev apsinde edi. Amma 2023 senesi aprel ayında onı SİZO-ğa avuştırdılar. Yaqında o etap etilecegi aqqında bildik, Suleymanovnıñ ayatı telüke altında olğanından pek raatsızmız", - dep yazıla bildirmede.
Daa PACE Rusiyeni Suleymanovnıñ ev apsinden cezahanege avuştırılması aqqında qararını lâğu etmesine ve kerekli tibbiy yardım köstermesine çağırdı.
ZMINA insan aqları merkezi Rusiye tarafından apis cezasına mahküm etilgen qırımtatar Amet Suleymanov Qırımdan Vladimir şeerindeki "T-2 Vladimirskiy tsentral"ğa etap etilgenini haber etti.
2021 senesi Rusiye mahkemesi Amet Suleymanovnı «Hizb ut-Tahrir davasına» istinaden 12 yılğa üküm etti.
Suleymanov sağlıq vaziyeti sebebinden 3 yıl ev apsinde edi. Jurnalistniñ yürekniñ arteriya ve mitral yetmemezligi bar, yürek klapanı acele deñiştirilmeli.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
