Zmina İnsan aqları merkeziniñ temsilcisi Tatyana Jukova Varşavada OSCE-niñ insan ölçegi boyunca halqara konferentsiyasınıñ sessiyası vaqtında siyasiy sebeplerden mahkeme qararlarınıñ çıqarılması ve qırımlı siyasiy mabüslerge tibbiy yardım kösterilmemesi içün mesüliyetli olğan insanlarğa qarşı sanktsiyalar kirsetmege çağırdı.
Onıñ aytqanına köre, yerli sakinler on yıldan berli diniy işançları, etnik mensüpligi, siyasiy baqışları ve fikirlerini ifade etkeni içün taqip telükesi altında yaşaylar.
Zmina malümatına köre, 218 qırımlı tutulğanı belli, olardan 132 qırımtatardır. Eñ azından 67 insannıñ sağlıq alı fenalaştı, yarısından ziyadesi ağır alda buluna ve tibbiy yardım alamay.
Çehiya Cumhuriyeti eyyetiniñ vekilleri ile körüşüv vaqtında Jukova, olıp keçkenler içün hususiy rusiyeli memurlarnıñ şahsiy mesüliyetine diqqat ayırdı. Misal olaraq, o, Rusiye Federatsiyasınıñ Qırım FSİN başı Vadim Bulgakovnı ketirdi, o, qırımlı siyasiy mabüslerniñ çoqusınıñ işlerinde insanlıqqa zıt şaraitlerde tutulması, tibbiy yardım kösterilmemesi ve yaqınları ile bağlanmasına mania olğanı içün mesüliyetlidir.
Qırımtatar Resurs Merkezi bildirgenine köre, Qırım ilhaqı vaqtında 362 siyasiy mabüs ve taqip etilgen şahıs qayd etildi, olardan 226 qırımtatar halqınıñ vekilleri.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
