Link açıqlığı

Saatnıñ esas haberi

"Olarğa cevap bermemizni pek sevmeyler"


Nariman Celâl, kollaj
Nariman Celâl, kollaj

Qırım.Aqiqat Qırımda apiske alınğan qırımtatar faali, siyasetçi ve jurnalist Nariman Celâlnıñ (vesiqalarda – Celâlovnıñ) beyanatlarını derc ete

Mahkeme oturışlarında iştirak içün çoq küçlü metanet kerektir. Mahkemeciler sıq-sıq ekiyüzlüler ve utanmazca davranalar, yersiz şaqa eteler, saçma laflar yürseteler ve saçma sualler bereler. Ve olarğa "cevap bermemizni" pek sevmeyler.

1. Menim tanışım daa sert cezadan qaçınmaq içün advokatnıñ tevsiyesi ile "itiraf etmek" qararına keldi, yani qabaatınıñ bütün maddelerini qabul etti. Şunıñ içün soñki mahkeme oturışında o, sıñırlama tedbiriniñ tevfqiften ev apsine deñiştirilmesine ümüt etti. Amma mahkemeci red etti. Suçlanğannıñ ve eki aydan ziyade balaları ile aqayını evde beklegen apayınıñ ögünde o evde aş aşatmaq ve oña aile bücetini sarf etmek zorunda qalmasın dep onı tevqifli qaldırğanı aqqında şaqa etti. Sanki devlet oña saip çıqacaq.

Ebet, bu alçaq adamğa onıñ aqqında tüşüngenlerini aytmamaq içün irade kereklidir. Adam susa, çünki kene de taqdiriñe, aileñniñ taqdirine qarar berecektir.

Nariman Celâl
Nariman Celâl

2. İyülniñ 13-nde bizim davamız üzre keçirilgen nevbetteki oturuşta Asan Ahtemov şaatlıq etti. Advokatlarnıñ işiniñ yeterli olacağına qarar berip, oña sual bermek niyetinde degil edim.

Mahkemelengenge qarşı qanunsız bedeniy zorlama usullarınıñ qullanması mahkemecilerniñ diqqatını çektimi sizce? Elbette yoq!

Asan iskenceler, yalan ifadelerni ezberlemege nasıl mecbur etilgeni aqqında aytıp berdi... Mahkemelengenge qarşı qanunsız bedeniy zorlama usullarınıñ qullanması mahkemecilerniñ diqqatını çektimi sizce? Elbette yoq! Mahkemecini eki şey meraqlandırdı: mahkemelengenniñ közleri baylı olsa, iskence vaqtında elektrik telleriniñ qulaqlarğa nasıl iliştirilgeni, ve bu qadar uzun itiraf metnini ezberlep olğan olsa, mektepte ne qadar uzun şiirler ezberlegeni.

Men artıq dayanamadım ve Asan iskenceler, tahqiqatnıñ sahtelenüvi aqqında aytıp berip olması içün oña buña oşağan sualler berip başladım.

"Siziñ daa sualleriñiz barmı?", - dep soradı mahkemeci.

"Tek bir sualim qaldı. Ne içün bu suallerni Asanğa prokuror ya da mahkemeci degil de, men berem?", - cevaplandım men.

Mahkemeci sual bergenler olar olğanını, men ise sual berip olamağanımnı hatırlattı. Bere bilirim ve berecegim!

Asan Ahtemov (solda) ve Nariman Celâl (sağda)
Asan Ahtemov (solda) ve Nariman Celâl (sağda)

3. İyülniñ 14-nde Azim Ahtemovnıñ sorğusınıñ videosını seyir ettik. O yorğun edi, kamera ögünde yuqlap qala edi. Tayin etilgen advokat cevaplarnı yavaştan ayta edi, kimerde Aziz nasıldır kâğıtlarğa baqa edi. Er şey şübeli şahısnıñ aqlarınıñ açıq şekilde bozulğanını ve ifadesiniñ sahtelenmesini numayış ete edi. Amma eñ esası, Azizniñ videodaki sözleri prokurornıñ videonı seyir etmeden evel oquğan aynı sorğunıñ yazılı protokolınıñ metnine bayağı uyğun degil edi.

Men yüksek sesnen laf etmege alıştım! Ve bunı yapmağa devam etecegim.

Tehnikiy bir mesele sebebinden teneffüs olğanda yüksek sesnen "Bu video "UFSB-niñ tahqiqat bölügine ve şahsen tahqiqatçı Vlasovğa ayıp" serleva ile yayınlamaq kerek" dedim.

"Celâlov kendiñizni tutıñız", - dedi maña mahkemeci.

"Men sadece advokatım ile laf etem. Bu yasaq degil!", - dedim.

"Aysa yavaşça oluñız", - tek bunı maña dedi o.

Men yüksek sesnen laf etmege alıştım! Ve bunı yapmağa devam etecegim.

Nariman Celâl

Qırımda apiske alınğan qırımtatar faali, siyasetçi ve jurnalist Nariman Celâlnıñ beyanatını advokat Nikolay Polozov Facebook saifesinde derc etti.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

Anğara köyündeki «gaz borusında diversiya» davası

Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.

Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.

FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.

Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.

Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.

Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.

Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.

XS
SM
MD
LG