Rusyeniñ kontroli altında olğan Qırım Yuqarı mahkemesi iyül 6-da Aqmescitte qırımtatarlarnıñ sürgün etilmesi hatırasına tedbirniñ iştirakçisi Seytasan Asanovnıñ davasındaki Rusiye polisiniñ apellâtsion şikâyeti boyunca oturışuvını nevbetteki sefer başqa künge keçirildi. Bunı Qırım.Aqiqat muhbiri bildire.
Oturışuv, polis hadimleri tarafından mayıs 17 adiseleriniñ şaatınıñ sorğulanmasına dair müracaat etilmesi münasebeti ile başqa künge keçirildi.
Asanovnıñ qorçalayıcısı Nazim Şeyhmambetov: «Bugün biz, şaatlarnı – Seytasan Asanovnıñ yaqalanmasında iştirak etken polis hadimlerini sorğulap oldıq. Olar episi Seytasannıñ añlatuvlar içün rayon bölügine barmaqtan vazgeçkenini tasdiqladılar. Aynı zamanda, cariy olğan qanunlarda añlatuvlardan vazgeçüv içün mesüliyet yoq», – dedi.
Bundan soñki oturışuvda Krılov soyadlı şaat, polis hadiminiñ sorğulanması planlaştırıldı.
Şeyhmambetov: «Şunı qayd etmek isteyim ki, biz adiseniñ şaatı Krılovnıñ da sorğulanmasını resmen istegen edik, lâkin o, kelmedi, ve keçken oturışuvda mahkeme, davanı Krılovnıñ sorğulanması yapılmadan baqmağa qarar berdi. Faqat polis hadimleri resmen müracaat etken soñ, şaat Krılov sorğulanacaq», – dep ilâve etti.
Seytasan Asanov mayıs 17-de aqşamnıñ keç maalinde Aqmescitte qırımtatarlar toplu yaşağan Aq-Meçet rayonında keçken qırımtatarlarnıñ sürgün etilmesi hatırasına tedbirden soñ yaqalandı.
Aralarında çağına yetmegen balalar da olğan yigirmi qadar yaqalanğannı beş polis maşinası ile Aqmescitniñ türlü içki işler bölüklerine alıp kettiler.
Daa soñra bazı yaqalanğanlarnı, başta añlatuvlarını, parmaq izlerini ve DNE nümunelerini alıp, yiberdiler.
Mayıs 18-de Kremlniñ kontroli altında olğan Aqmescitteki Merkeziy rayon mahkemesi Seytasan Asanovğa dair «polis hadiminiñ qanuniy talaplarına boysunmağanı aqqında cinaiy işniñ yürütilmesini, cinayet terkibiniñ olmağanı sebebinden toqtattı».
Qırımtatar halqını Qırımdan sürgün etüv qurbanlarınıñ hatıra künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
