Kremlniñ kontroli altında olğan Aqmescitteki Merkeziy rayon mahkemesi Seytasan Asanovğa dair polis hadiminiñ qanuniy talaplarına boysunmağanı aqqında işniñ yürütilmesini cinayet terkibiniñ olmağanı sebebinden toqtattı. Bunı mayıs 18-de Qırım.Aqiqat muhbiri bildire.
Raport ve memuriy protokolğa binaen, Asanov polis hadimi Buçenkoğa boysunmadı. Bu, onıñ qanunğa qarşı areketleriniñ (naqliyat içün ayırılğan qısımda turdı, areketke keder etti, ellerini salladı ve qıçırdı) toqtatılmasını ve polis maşinasına keçmesini red etkeni ile ifadelengen edi.
Asanov qabaatını tanımadı. Hatıra tedbirinde iştirak etmegenini, yanında keçip, bir çoq insan ve uquqqoruyıcı organları hadimleriniñ toplaşqanını körip, neler olğanını bilmek içün toqtağanını ikâye etti.
Asanovnıñ aytqanına köre, bundan soñ onıñ yanına polis hadimleri kelip, polis maşinasına ifadeler bermek içün keçmege teklif ettiler. Lâkin cevap bergenini beklemeyip, qollarını qayırmağa ve maşinanıñ yaqalanğanlar içün ayırılğan bölügine itep başladılar.
Asanov: «Qorllarımnı qayırıp başladılar. Tam olaraq üç kişini kördim. Bu sebepten de qollarımnı çekip almağa tırıştım. Endi qaranlıq edi. Meni maşinanıñ yük bölügine tıqacaq oldılar. Böyle vaziyetke birinci kere oğradım, bilmegen şeyim meni qorquza edi», – dep añlattı.
Akem Aleksandr Voronoy, polisler uniformalı olıp da, Asanovnıñ muayen olaraq nenden qorqqanını soradı. Aynı zamanda akem, advokat Semedlâyevniñ, Ervin İbragimovnıñ alıp qaçılması aqqında sualini, işke munasebeti yoq dep, alıp taşladı.
Qorçalav şaatları, qabaatlanğannıñ qarşılıq köstermegenini, uquqqoruyıcı organları hadimlerine aqaret etmegenini ve olardan qaçmağanını tasdiqladılar.
Ondan ğayrı advokatlar, polis hadimleri tarafından pek çoq protsessual hatalar yapılğanını, tizgen memuriy materiallarında pek çoq hata ve tüzetüv olğanını qayd ettiler. Aynı zamanda, uquqqoruyıcı organlarnıñ üç hadimi tarafından tizilgen raportlar bir-biri ile aynıdır.
Semedlâyev: «Raportlar ya üçü de bir kişi tarafından aytılıp, ya da bir-birinden köçürilip yazılğanlar. Olarnıñ hataları bile bir-biri ile aynı», – dep qayd etti.
Seytasan Asanov mayıs 17-de aqşam keç maalinde Aqmescitte, qırımtatarlar toplu yaşağan Aq-Meçit Cami rayonında keçken qırımtatar halqınıñ sürgün etilmesi qurbanlarını añma tedbirinden soñ yaqalanğan edi.
Aralarında çağına yetmegen balalar olğan yigirmi qadar yaqalanğannı polis maşinaları ile Aqmescitniñ türlü İçki işler bölüklerine alıp kettiler.
Daa soñra bazı yaqalanğanlarnı, başta añlatuvlarını, parmaq izlerini ve DNE nümunelerini alıp, yiberdiler.
Qırımtatar halqını Qırımdan sürgün etüv qurbanlarınıñ hatıra künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
