Link açıqlığı

Saatnıñ esas haberi

Rusiyede, açlıq tutqan Yaltadaki «Hizb ut-Tahrir işi» figurantınıñ alı fenalaştı – Denisova


Emir-Useyin Kuku

Ukraina Yuqarı Radasınıñ insan aqları boyunca vekili Lüdmila Denisova, Yaltadaki «Hizb ut-Tahrir işi» figurantı Emir-Useyin Kukunıñ sağlıq vaziyeti fenalaşqanı münasebeti ile Rostov vilâyetindeki tahqiqat izolâtorınıñ rehberine müracaat etkenini bildirdi.

Bildirüvde: «Emir-Useyin Kukuda sağlıq vaziyetiniñ fenalaşması münesebeti ile öz raatsızlığımnı ifade etem ve sizden, oña zarur olğan salâhiyetli tibbiy yardımnıñ temin etilmesi içün bütün kerekli çarelerni körmek ve, ondan ğayrı, maña Kukunıñ sağlıq vaziyeti aqqında aktual malümatnı bermekni rica etem», – denile.

Bunıñ kibi de, Denisova, oña bu müracaatnıñ baqılması neticelerine dair malümatnıñ berilmesini istegenini qayd etti.

Yaltadaki «Hizb ut-Tahrir işi» figurantı Emir-Useyin Kuku iyün 26-da açlıq ilân etti.

Mevzuğa dair: «Onı qanunsızlıq itedi»: Emir-Useyin Kuku bir afta açlıq tuta

Mayısnıñ soñunda Şimaliy Kavkaz okrugınıñ arbiy mahkemesi Yaltadaki «Hizb ut-Tahrir işi»niñ altı figurantınıñ tevqif müddetini üç ayğa uzattı.

Bu iş boyunca qabaatlanğan Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada yaqalandılar. Olarnı Rusiyede yasaq etilgen «Hizb ut-Tahrir» siyasiy İslâm teşkilâtına alâqadar olğanlarında qabaatlaylar.

Rusiye arbiy mahkemesi Yaltadaki «Hizb ut-Tahrir işi»ni Aqmescitte ötkerilgen köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.

Ukraina Tış işleri nazirligi Rusiyeden Yaltadaki «Hizb ut-Tahrir işi» figurantlarınıñ azat etilmesini talap ete.

«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.

«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olar diniy alâmetke köre taqip etile, dep sayalar. Advokatlar, Rusiye uquqqoruyıcı organları tarafından bu iş boyunca taqip etilgenlerniñ çoqusı qırımtatar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq işğal etilgen territoriyada işğal etken devletniñ qanunlarını tatbiq etmekni yasaq ete.

XS
SM
MD
LG